UKOL KAY
MARIA: PINAHAHALAGAHAN
ANG ISANG
NILALANG LAMANG NANG
HIGIT PA SA
DIYOS AT KAY CRISTO
Sinulat ni BENJAMIN SANTIAGO SR.
NAPAKARAMI ang mga katangiang ipinatutungkol ng Iglesia
Katolika kay Mariang Ina ni Jesus. Iba’t
iba ang mga katawagang ikinapit sa kaniya bilang pagpaparangal, pagpuri at
pagsamba. Pati na ang mga katangiang
nauukol lamang sa Diyos at sa ating Panginoong Jesucristo ay ikinapit na rin
kay Maria. Marahil ay upang
pagpapaalalahanan ang mga Katoliko na pag-ibayuhin ang pamimitagan at
pamimintakasi sa kaniya.
Ano ang pagkakilala ng Iglesia
Katolika kay Mariang ina ni Jesus? Sa isang aklat na pinamagatang Glories and Virtues of Mary, sinulat ng isang pareng Katoliko na ang
pangala’y J. Alberione, may Nihil Obstat ng pareng si Joseph Villena, may
Imprimatur ni Richard J. Cushing,
arsobispo ng Boston, at may Reimprimatur ni Rufino J. Cardinal Santos, ganito
ang sinasabi sa pahina 150:
“Mary had a fullness of grace
for all men; she was destined to be the universal
mediatrix between the Son of God and us.”
Sa Pilipino:
“Si Maria ay nagkaroon ng
kaganapan ng mga biyaya para sa lahat ng tao; siya ay itinalaga upang maging pambuong daigdig na tagapamagitang babae
sa Anak ng Diyos sa atin.”
Tinatanggap ba ng mga apostol ang
aral na ito ng Iglesia Katolika? Itinuro
ba nila na si Maria ay tagapamagitan sa Anak ng Diyos at sa atin? Ganito ang pahayag ni Apostol Juan:
“Mumunti kong mga anak, ang mga bagay na ito ay isinusulat ko sa inyo upang kayo'y huwag mangagkasala. At kung ang sinoman ay magkasala, ay may Tagapamagitan tayo sa Ama, si Jesucristo ang matuwid.” (I Juan 2:1)
Ang itinuro ni Apostol Juan na Tagapamagitan kung tayo’y
magkasala ay ang ating Panginoong Jesucristo—hindi si Maria.
Sino naman at ilan ang
Tagapamagitan sa Diyos at sa mga tao na
itinuro ni Apostol Pablo? Sa I
Tim. 2:5, ay ganito ang sinasabi:
“Sapagka't may isang Dios at may isang Tagapamagitan sa Dios at sa mga tao, ang taong si Cristo Jesus.”
IIsa lamang—hindi marami—ang itinuro ni Apostol Pablo na
Tagapamagitan sa Diyos at sa mga tao, ang taong si Cristo Jesus—hindi si
Maria. Isa itong katunayan na ang
katangiang tanging kay Cristo nauukol ay ikinapit kay Maria. Hindi ito kasalanan ni Maria. Walang kamalay-malay si Maria sa ginawa sa
kaniya ng mga pare!
Ano ang isang katawagan na
ikinapit ng Iglesia Katolika kay Mariang ina ni Jesus? Sa aklat ding Glories and Virtues of Mary, pahina 32, ay ganito ang sinasabi:
“We avow that Mary Most Holy
is the true Mother of God …”
Sa Pilipino:
“Tahasang ipinahahayag namin
na ang Kabanal-banalang si Maria ay ang tunay na Ina ng Diyos …”
Totoo bang ang Diyos ay may
ina? Ang tunay na Diyos ba’y
ipinanganganak? Ang Diyos ba’y anak ng
Tao? Ganito ang pahayag ng
Biblia:
“Ang Dios ay hindi tao na magsisinungaling, Ni anak ng tao na magsisisi; Sinabi ba niya, at hindi niya gagawin? O sinalita ba niya, at hindi niya isasagawa?” (Blg. 23:19)
Labag sa aral ng Biblia ang turo na si Maria’y ina ng
Diyos.
Ano pa ang napakamaling
pagkakilala ng Iglesia katolika kay Mariang ina ni Jesus? Sa isang munting aklat na pinamagatang Ang Aking Birhen Mariang Tagapamagitan,
inihanda nina S. Flores at R. Alejandro, may Nihil Obstat ng pareng Artemio G.
Casas, censor, at may Imprimatur ni J. Jovellanos, Arzobispado de Manila, ay
ganito ang sinasabi sa pahina 57-59:
“Palakasin mo Birhen ko ang
aking katawan at kaluluwa sa ikakikilala sa kapangyarihan mong walang-hanggan,
paglingkuran ka ng tapat at sundin ang iyong mga utos, luwalhatiin ang iyong
pangalan at biyaya, ibigin ka ng boong ningas sa aking puso, sambahin ka at
tuwina’y alalahanin, SAPAGKA’T IKAW ANG
DIYOS NG AWA, ang aking pag-asa, ang aking tungkod, ang aking lakas at ang
buhay. Maawa ka Panginoon, lawitan ako
ng biyayang kalusugan at katahimikan, lingapin itong kahabag-habag na magulang
ng iyong mga nilalang.”
Kagulat-gulat ang pagkakilalang ito ng Iglesia Katolika
kay Maria! Walang hanggan daw ang kapangyarihan
nito, kaya dapat paglingkuran nang tapat at sundin ang kaniyang (Maria) mga
utos. Luwalhatiin daw ang pangalan,
ibigin nang boong ningas sa puso, sambahin at tuwina’y alalahanin, sapagka’t si
Maria raw ang Diyos ng awa, ang kanilang pag-asa, ang kanilang tungkod, ang
kanilang lakas at buhay. At lumalabas pa
sa panalanging ito kay Maria na siya ang lumalang sa tao. Napakalaking pagkakamali! Hindi na kaya ito inisip ng mga pare? Hindi na kaya sila kinilabutang ituro na si
Maria ay siyang Diyos ng awa at siyang lumalang sa tao? Matatanggap kaya ito ng mga matitinong kaanib
sa Iglesia Katolika? At anong uring Diyos daw si Maria? Sa munting aklat din na pinalabas ng mga
pareng katolikong sina Artemio Casas at Jose Jovellanos, sa pahina 63, ay ganito
ang sinasabi:
“… ang aking mga kapatid at
ang kapuwa ko tao na iyong mga nilikha. Mahabag ka, Ina ko, dito sa iyo, na
nagnanasang ikaw ay sambahin, igalang, at purihin ng boong pag-ibig sa lahat ng
bagay, sapagka’t Diyos kang maawain at makapangyarihan
sa lahat… Igawad mo Diyos ko, ang
iyong pag-iingat at pagpapala sa puso at kaluluwa kong nagnanasang umibig sa
iyo sa kabuhayan at sa kamatayan magpasa walang hanggan. Siya nawa.”
Anong uring Diyos si Maria ayon sa mga pare? Diyos daw na maawain at makapangyarihan sa
lahat at siya raw lumikha sa tao. Diyos
na makapangyarihan sa lahat si Maria?
Nakakikilabot! Matatanggap ba
ninyo ang kamaliang ito, mga kababayang Katoliko? Susundin ba ninyo ang itinuturong ito ng mga
pare? Mag-isip-isip kayo, mga
kababayan! Ang karapatan at ang
katangiang tanging sa Diyos lamang nauukol ay ibinigay ng mga pare kay
Maria. Walang kasalanan si Maria sa
bagay na ito! Hindi niya nalalaman ang
ginawa sa kaniya ng mga pare, sapagka’t siya ay patay na. Kung siya’y buhay ay hindi niya papayagan ang
malaking kalapastanganang ito sa Diyos.
Dahil sa ang kinikilalang Diyos
na makapangyaarihan sa lahat ng Iglesia Katolika ay si Maria, ano ang malaking
bagay na nawala sa kanila ayon sa turo ng ating Panginoong Jesucristo? Sa Juan 17:3, 1¸ay ganito ang sinasabi:
“At ito ang buhay na walang hanggan, na ikaw ay makilala nila na iisang Dios na tunay, at siyang iyong sinugo, sa makatuwid baga'y si Jesucristo. Ang mga bagay na ito ay sinalita ni Jesus; at sa pagtingala ng kaniyang mga mata sa langit, ay sinabi niya, Ama, dumating na ang oras; luwalhatiin mo ang iyong Anak, upang ikaw ay luwalhatiin ng Anak.”
Dahil sa maling pagkakilalang itinuro ng mga pare ay
nawalan ng buhay na walang hanggan ang mga Katoliko. Ang pananalig na may buhay na walang hanggan
ay ang makilala ang iisang Diyos na tunay.
Sino ang iisang Diyos na tunay na itinuro ng ating panginoong
Jesucristo? Ang Amang nasa langit na
Kaniyang dinadalanginan. Ni hindi Niya
itinurong Siya ang iisang Diyos na tunay.
Kailanman ay hindi inangkin ni Jesus ang karapatang hindi Kaniya. Kaya sapagka’t si Maria ang kinikilala ng mga
pare na Diyos ng awa at makapangyarihan sa lahat, wala silang buhay na walang
hanggan. Kung ibig ninyong magtamo ng
buhay na walang hanggan, mga kababayang Katoliko, itakwil ninyo ang maling turo
ng mga pare at tanggapin ninyo ang itinuro ng ating Panginoong Jesucristo.
Mayroon pa bang hidwa o maling
pananampalataya ang Iglesia Katolika tungkol kay Mariang ina ni Jesus? Sa aklat na Glories and Virtues of Mary
na atin nang ginamit sa unahan nito, mga pahina 53-54, ay ganito ang nasusulat:
“Co-Redemtrix — Even though it was in a secondary manner, Mary did
co-operate with Jesus Christ, Our Redeemer, in saving us from eternal
damnation.”
Sa Pilipino:
“Katulong na Manunubos — Bagama’t hindi sa pangunahing paraan si Maria
ay gumawang kasama ni Jesucristo, ang ating Manunubos, sa pagliligtas sa atin
mula sa walang hanggang kaparusahan.”
Totoo kaya ang sinasabing ito ng
mga pare? Mayroon nga kayang naitulong
si Maria sa ating Panginoong Jesucristo sa pagliligtas sa atin sa
kaparusahan? Si Maria nga kaya’y
katulong na Manunubos ng ating Panginoong Jesucristo? Sinasang-ayunan ba ito ng mga apostol? Sa Efe. 1:7, ay ganito ang pahayag ni Apostol
Pablo:
“Na sa kaniya'y mayroon tayo ng ating katubusan sa pamamagitan ng kaniyang dugo, na kapatawaran ng ating mga kasalanan, ayon sa mga kayamanan ng kaniyang biyaya.”
Kanino naroon ang katubusan ng tao at kapatawaran ng mga
kasalanan? Na kay Cristo—wala kay Maria.
Hindi sinabi ni Apostol Pablo na na kay Cristo at na kay Maria ang ating
katubusan at kapatawaran ng mga kasalanan—hindi sila magkatulong na gaya ng
itinuturo ng mga pare. Isa pang
katunayang walang katulong si Cristo sa pagtubos, ay ganito pa ang sinasabi sa
Roma 3:24-25:
“Palibhasa'y inaring-ganap na walang bayad ng kaniyang biyaya sa pamamagitan ng pagtubos na nasa kay Cristo Jesus: Na siyang inilagay ng Dios na maging pangpalubagloob, sa pamamagitan ng pananampalataya, sa kaniyang dugo, upang maipakilala ang kaniyang katuwiran dahil sa hindi pagpansin sa mga kasalanan na nagawa nang nagdaang panahon sa pagpapahinuhod ng Dios.”
Ang pagtubos ay na kay Cristo—wala kay Maria, at ang
ipinantubos ni Cristo ay ang Kaniyang dugo—hindi ang dugo ni Maria. At ang tinubos ni Cristo o binili ng Kaniyang
dugo ay ang Iglesia ni Cristo (Gawa
20:28, LAMSA)
Hidwa o maling pananampalataya ang itinuturo ng mga pare
na si Maria ay katulong ni Cristo sa pagtubos sa tao para iligtas sila sa
walang hanggang kaparusahan. At sapagka’t ito’y hidwang pananampalataya, ano ang kasamaan
nito? Sa Gal. 5:20-21, ay ganito
ang nasusulat:
“Pagsamba sa diosdiosan, pangkukulam, mga pagtataniman, mga pagtatalo, mga paninibugho, mga pagkakaalitan, mga pagkakampikampi, mga pagkakabahabahagi, mga hidwang pananampalataya, Mga kapanaghilian, mga paglalasing, mga kalayawan, at ang mga katulad nito; tungkol sa mga bagay na ito ay aking ipinagpapaunang ipaalaala sa inyo, tulad sa aking pagpapaalaala nang una sa inyo, na ang mga nagsisigawa ng gayong mga bagay ay hindi magsisipagmana ng kaharian ng Dios.”
Marahil ay iisipin ng mga makababasa nito, lalo na ng mga
kababayan naming mga Katoliko, na hindi kinikilala ng Iglesia ni Cristo si Maria.
Marahil ay pinagwiwikaan nila kami ng lapastangan at walang galang sa
Ina ni Jesus. Hindi po totoo iyan! Kinikilala namin si Maria. Siya’y aming iginagalang at
pinagpipitaganan. Subali’t ang aming
pagkilala kay Maria ay hindi hihigit sa pagpapakilala ng Biblia. Kung ano lamang ang sinasabi ng Biblia tungkol
kay Maria ay yaon lamang ang aming tinatanggap at sinasampalatayanan.
Ano ang pagpapakilala ng Biblia
tungkol kay Maria? Sa Gawa 1:14
ay sinasabi ang ganito:
“Ang lahat ng mga ito'y nagsisipanatiling matibay na nangagkakaisa sa pananalangin na kasama ang mga babae, at si Maria na ina ni Jesus, at pati ng mga kapatid niya.”
Si Maria ay ina ni Jesus.
Iyan ang pagpapakilala ng Biblia.
Ayaw na naming humigit pa sa riyan.
Higit pa riyan ay kasalanan na.
Sinabi ni Apostol Pablo:
“… upang sa amin ay mangatuto kayo na huwag magsihigit sa
mga bagay na nangasusulat …” (I Cor. 4:6)
Sinusunod namin ang turong ito ni Apostol Pablo. Hindi dapat humigit sa nasusulat.
Ano naman ang pagkakilala ni
Maria sa sarili? Naniniwala ba si Maria
na siya’y Diyos na makapangyarihan sa lahat?
O kaya’y tagapamagitan sa Anak ng Diyos at sa atin, gaya ng itinuturo ng
Iglesia Katolika? Pabayaan nating
si Maria mismo ang magpakilala sa kaniyang sarili. Ganito ang sabi niya:
“At sinabi ni Maria, Narito, ang alipin ng Panginoon; mangyari sa akin ang ayon sa iyong salita. At iniwan siya ng anghel.” (Luk. 1:38)
Maliwanag ang sabi ni Maria. Siya’y alipin lamang ng Panginoon. Hindi siya tagapamagitan, lalong hindi siya
Diyos na makapangyarihan sa lahat.
Napakaganda ng pagkakilala ni Maria sa kanyang sarili. Siya’y mababang loob. Siya’y masunurin sa Diyos. Kung ano ang kalooban ng Diyos ay siyang
sinusunod niya, kahit na siya’y maging kahiyahiya sa harapan ng mga tao.
Naniniwala ba naman si Maria na
siya’y Tagapagligtas? Tunghayan
natin ang pahayag ni Maria:
“At sinabi ni Maria, Dinadakila ng aking kaluluwa ang Panginoon, At nagalak ang aking espiritu sa Dios na aking Tagapagligtas.” (Luk. 1:46-47)
Si Maria’y hindi tagapagligtas. Siya’y napaliligtas lamang sa Diyos na
kaniyang Tagapagligtas. Sawimpalad ang mga taong napaliligtas kay Maria sa
pag-asang siya’y tagapagligtas. Mabibigo
ang mga ito, sapagka’t si Maria’y hindi tagapagligtas kundi nangangailangan din
siya ng kaligtasan tulad natin. Marahil
ay itatanong natin; “Bakit sinabi ni
Maria na ang Diyos ang kaniyang Tagapagligtas?
Hindi ba si Cristo ang Tagapagligtas?”
Ang Diyos nga ang ating Tagapagligtas, subali’t ang Diyos ay nagliligtas
sa pamamagitan ng ating Panginoong Jesucristo (Jud. 1:25).
Napakarami pang mga titulo o pamagat ang ikinapit ng
Iglesia Katolika kay Maria, na kung iisa-isahin ko rito ay hahabang totoo ang
lathalaing ito. Sapat na ang mga
inihayag dito upang makilala ng lahat na labis na sa talagang nararapat ang
pagpapahalaga ng Iglesia Katolika kay Maria.
Pinahahalagahan nila si Maria, dinadakila at sinasamba nang higit pa sa
Diyos at kay Cristo. Hindi na ito
pagpaparangal at pagdakila kay Maria kundi paglapastangan at pag-alipusta sa
marangal na babaing ina ni Jesus.--*
Kinopya mula sa PASUGO/May 1978/Pahina 34-36/Volume
XXX/Number 5
