Ang Kahalagahan At Misyon Ng Iglesia

Ang Kahalagahan At Misyon Ng Iglesia

Sinulat ni GREG F. NONATO

MARAMI ANG HINDI NAKABABATID kung ano ang tinatawag na Iglesia na itinuturo ng Banal na Kasulatan. Kung kanino ito at kung ano ang kahalagahan at misyon ng Iglesia ay ilan lamang sa mga katanungan ng marami. Minarapat naming talakayin sa isyung ito kung ano ang Iglesia na binabanggit sa Biblia at ang kahalagahan ng misyon nito. Aling Iglesia ito? Kanino ang Iglesiang ito? Ano ang tinatawag na Iglesia?

Ang tinatawag na Iglesia

Ano ang Iglesia? Ang Iglesia ay binubuo ng mga tao na tinawag mula sa kapangyarihan ng kadiliman upang ilipat sa kaharian ng Anak (Col. 1:13). Ang bumubuo sa Iglesia ay tinawag sa pamamagitan ng pangangaral ng ebanghelyo (II Tes. 2:14). Inutusan ni Jesus ang Kaniyang mga alagad na ipangaral ang ebanghelyo (Mar. 16:15), ang sumampalataya ay dapat bautismuhan (Mar. 16:16), upang maging bahagi ng isang katawan (I Cor. 12:13, New Pilipino Version). Ang mga binautismuhan ay idinaragdag sa Iglesia (Gawa 2:41, 47). Ang Iglesia ay binubuo ng mga taong pinangaralan ng mga salita ng Diyos, sumampalataya sa mga ito, at binautismuhan. Ang Iglesia ay binubuo ng mga tinawag sa isang katawan (Col. 3:15) na ang ulo ay si Cristo (Col. 1:18). Isa lang ang katawan (Efe. 4:4). Ang isang katawan ay ang Iglesia (Col. 1:18). Kaya, isa lamang ang tunay na Iglesia at ito lamang ang ililigtas.

Sinasangayunan ito ng iba’t ibang nagsuri ng Biblia:

Iisa ang Iglesia Ni Cristo ayon sa pangungusap mismo ni Cristo

“Thus far we have drawn these assertions from the words of the Savior: There is one Church (from the word “Church”), it is Christ’s (from the word “My”), and it is holy (from the promise, “and the gates of hell shall not prevail against it”). From this we conclude that there is one, holy Church of Christ …” (Forerunners of the Reformation: The Shape of Late Medieval Thought, p. 233).

Sa sariling pangungusap ni Cristo ay mayroon lamang iisang Iglesia Ni Cristo

“Up to this point it has been deduced from the Saviour’s words that there is (1) one church—namely, from the very word “church”; (2) that it is Christ’s church—from the word “my” … (Valiant for the Truth, p. 82)

Mayroon lamang isang Iglesia Ni Cristo

“ … There can be only one Church of Christ. Christ said: ‘I am the good shepherd, and I know mine and mine know me. … And other sheep I have that are not of this fold, them also I must bring, and they shall hear my voice, and there shall be one fold and one shepherd’ (John 10:14, 16) …” (Roman Catholicism, p. 285)

“There is but one Church of Christ.” (The Credo of the People of God, p. 136)

“Bakit iisa lamang ang tunay na Iglesya ni Kristo? Sapagka’t iisa lamang ang Iglesyang itinatag ni Kristo.” (Katesismong Kristiyano, p. 15)

“ … True there is only one Church of Christ. She alone is the body of Christ and without her there is no salvation …” (The Spirit of Catholicism, p. 192)

Iisa lamang ang Iglesia Cristiana sa buong mundo at ito ang Iglesia ni Cristo

“At the turn of this century, theologian John Murray wrote: ‘Ideally there ought to be only one Christian Church throughout the whole world, the Church of Christ, one in doctrine, one in worship, one in government, one in discipline.” (Monthly Moody, September 1984, p. 28)

Kinikilala ng Katoliko at Protestante na iisa lamang ang Iglesia ni Cristo

“Evangelicals and Catholics are brothers and sisters in Christ … We recognize that there is one Church of Christ.” (Protestant and Catholics, Do They Now Agree?, p. 135)

Ang Iglesiang ito na espirituwal na katawan ni Cristo ang tangi Niyang ililigtas (Efe. 5:23) sapagkat ang Iglesia ang tinubos ni Cristo ng Kaniyang dugo (Gawa 20:28). Dahil dito ang mga tinawag na mga kaanib sa Iglesia ay Kaniyang inaring ganap (Roma 8:30). Wala na silang hatol o hindi na sila hahatulan sa araw ng paghuhukom (Roma 8:1). Sila ang ipinakipagka-isa kay Cristo (I Cor. 1:9, Magandang Balita Biblia). Ang mga nasa Iglesia ay ang mga tinawag—hindi sa ikarurumi kundi sa pagpapakabanal (I Tes. 4:7). Kaninong Iglesia? Sinabi ni Jesus kay Pedro: “Sa ibabaw ng batong ito ay itatayo ko ang aking iglesia; …” (Mat. 16:18). Ang salitang “aking” ay nagpapakilala na si Cristo ang nagmamay-ari sa Iglesia. Ang ganitong pagpapakahulugan ay matuwid lamang sapagkat ang Iglesia ay katawan at ang katawang ito ay kay Cristo sapagkat siya ang ulo ng Iglesia (Col. 1:18).

Makatuwiran din na tawagin ito ni Apostol Pablo na Iglesia ni Cristo sapagkat si Cristo ang nagmamay-ari sa Iglesia. Sinasangayunan ito ng mga awtoridad sa iba’t ibang relihiyon:

“The Church is the body of Jesus Christ. Eph. 1:22, 23. The idea of ownership is absolute here. As a man’s body is his own not another’s, so the church is the church of Christ and not of another.” (The Church in the Bible, p. 349)

“The church wore the name of Christ. Speaking of the various congregations, Paul wrote, ‘The churches of Christ salute you’ (Romans 16:16).” (The Church of the Bible, pp. 22)

“All Christians ought to be members of one church, for there is but one foundation, which is Christ. And the name of this body originates from its head, which makes it “the Christian Church or the Church of Christ.” (The Stone-Campbell Movement: An Anecdotal History of Three Churches, p. 88).

“In regard to Mt. 16, 18, St. Cyprian speaks of the building of the Church by Christ, and designates the Church the ‘Church of Christ’ and the ‘Bride of Christ’.” (Fundamentals of Catholic dogma, p. 274)

“And I tell you, you are Peter, and on this rock I will build My Church and the gates of hell shall not prevail against it. I will give you the keys of the kingdom of heaven and whatever you bind on earth shall be bound in heaven, and whatever you loose on earth shall be loosed in heaven. The Gospel speaks here of the Church of Christ, its faith and its foundation and authority. The Church is referred to by the words, ‘will build my Church …’” (Forerunners of the Reformation: The Shape of Late Medieval Thought, p. 231)

“ … Christ predicted the founding of a new congregation or church, a divine institution that should continue his work on earth. Matt. 16:18. This is the church of Christ, which came into existence on the Day of Pentecost.” (Knowing the Doctrines of the Bible, p. 349)

“He conferred authority in the Church; explained the importance of designating the organization by its proper name—The Church of Christ; …” (The Great Apostasy, p. 12)

Ang Iglesia Ni Cristo ang iisang tunay na Iglesia na itinatag ni Cristo na dapat aniban ng mga tao upang sila ay maligtas sa parusa ng Diyos sa araw ng paghuhukom (Juan 10:9, Revised English Bible, Gawa 20:28, Lamsa Translation). Ito ang kahalagahan at misyon ng Iglesia.

Pasugo God’s Message/August 2014/Volume 66/Number 8/ISSN 0116-1636/Pages 44-45

ANG LALONG MAHALAGA

ANG LALONG MAHALAGA

MADALING MALAMAN kung aling bagay ang mahalaga para sa atin.  Ito’y ang pinag-uukulan natin ng mahabang panahon.  Hindi natin pinanghihinayangan gaano man ang maging puhunan natin para  rito lalo na’t umaasa tayong ito ay ating pakikinabangan.  Sa kabilang dako, kung sa akala natin ay wala tayong pakikinabangin sa isang bagay, hindi natin ito pag-uukulan ng ating panahon.

Sa panahong ito, may mga taong walang pagpapahalaga sa paglilingkod sa Diyos at sa pagsunod sa Kaniyang mga utos.  Itinuturing pa nga ng iba na ito ay walang kabuluhan at walang pakinabang (Mal. 3:14).

Ayon naman sa iba, wala raw kaibahan kung sila man ay maglingkod at sumunod sa Diyos o hindi.   Iminamatuwid nila na iisa ang hantungan ng lahat, at kapuwa naman daw mamamatay ang naglilingkod sa Diyos at ang hindi (Ecles. 9:2).  Kaya, ano raw ang kaibahan kung sumunod o hindi?

Ang iba naman ay naiinggit sa masama.  Sinasabi nila na nabubuhay rin naman ang masama, nagiging makapangyarihan, at sumasagana pa nga ang ilan sa kanila (Job 21:7, 13).

Kaya, bakit pa raw magpapakahirap sa paglilingkod sa Diyos at sa pagsunod sa Kaniyang mga utos?  Tama kaya ang mga sinasabi nilang ito?

NILALANG TAYO UPANG MAGLINGKOD

Para sa Diyos, ang paniniwalang hindi mahalaga at walang kabuluhan ang paglilingkod sa Kaniya ay tahasang paglapastangan sa Kaniya:

“Ang inyong mga salita ay naging lapastangan laban sa akin, sabi ng Panginoon. Gayon ma'y inyong sinasabi, Sa ano kami nangagsalita ng laban sa iyo?  Inyong sinabi, Walang kabuluhan ang maglingkod sa Dios; at anong kapakinabangan nito na ating iningatan ang kanyang bilin, at tayo'y nagsilakad na may pananangis sa harap ng Panginoon ng mga hukbo?” (Mal. 3:13-14)

Maling isipin na walang kabuluhan ang maglingkod sa Diyos dahil ito mismo ang layunin Niya sa paglalang sa atin:

“Mangaglingkod kayo na may kasayahan sa Panginoon; magsilapit kayo sa kaniyang harapan na may awitan.  Alamin ninyo na ang Panginoon ay siyang Dios; siya ang lumalang sa atin, at tayo'y kaniya: tayo'y kaniyang bayan, at mga tupa ng kaniyang pastulan.” (Awit 100:2-3)

Tayo ay nilalang ng Diyos upang maging Kaniya—upang paglingkuran Siya.  Kaya, pananagutan natin ang maglingkod sa kaniya.  Kung ayaw nating maglingkod sa Diyos, tahasan nating sinasalungat ang layunin ng pagkakalalang niya sa atin.

AYON SA KATOTOHANAN

Maaaring sabihin ng iba na sila’y may kinaaanibang relihiyon at naglilingkod sa Diyos, kaya hindi raw sila tumatalikod sa pananagutang ito sa Kaniya.  Pero ano bang uring paglilingkod ang dapat nating iukol sa Diyos?  Ayon sa Biblia:

“Matakot lamang kayo sa Panginoon, at maglingkod kayo sa kaniya sa katotohanan ng inyong buong puso; dilidilihin nga ninyo kung gaanong dakilang mga bagay ang kaniyang ginawa sa inyo.” (I Sam. 12:24)

Dapat nating paglingkuran ang Diyos sa katotohanan—hindi sa anumang paraan na ating magustuhan.  Totoong dapat na maging buong puso ang ating gagawing paglilingkod, ngunit dapat din itong masalig sa katotohanan o sa mga salita ng Diyos (Juan 17:17).

Kaibigan, ito ang dapat nating suriing mabuti.  Ang paraan ba ng paglilingkod natin sa Diyos ay nakasalig sa Kaniyang katotohanan o sa mga salita Niyang nakasulat sa Biblia?  Mahalagang ito ay ating matiyak dahil walang kabuluhan ang pagsambang nakasalig lamang sa aral at utos ng tao at hindi sa kalooban ng Diyos:

“Datapuwa't walang kabuluhan ang pagsamba nila sa akin, Na nagtuturo ng kanilang pinakaaral ang mga utos ng mga tao.” (Mat. 15:9)

Hindi mabuting tumanggi tayong maglingkod sa Diyos nang ayon sa katotohanan.  May ibinabalang parusa ang Diyos para sa lahat ng ayaw sumunod sa Kaniyang mga utos:

“Na maghihiganti sa hindi nagsisikilala sa Dios, at sa kanila na hindi nagsisitalima sa evangelio ng ating Panginoong Jesus:  Na siyang tatanggap ng kaparusahan, na walang hanggang kapahamakang mula sa harapan ng Panginoon at mula sa kaluwalhatian ng kaniyang kapangyarihan.” (II Tes. 1:8-9)

Ang mga hindi tumatalima sa ebanghelyo ay parurusahan sa apoy sa Araw ng Paghuhukom.  Kaya, kung hindi natin ipagpapauna ang paglilingkod sa Diyos at hindi natin susundin ang Kaniyang mga utos, masasadlak tayo sa matinding kasawian.  Ang mga bagay na ating pinag-ukulan ng higit na pagpapahalaga ay mauuwi lamang sa wala.  Gaya nga ng sinabi ng Panginoong Jesucristo:

“Sapagka't ano ang pakikinabangin ng tao, kung makamtan niya ang buong sanglibutan at mawawalan siya ng kaniyang buhay? o ano ang ibibigay ng tao na katumbas sa kaniyang buhay?” (Mat. 16:26).

Kahit pa nga napakalaki ng ating matamong kayamanan, kapangyarihan, o katanyagan—kahit pa makamtan natin ang buong sanlibutan—ay wala ring pakinabang kung mawawala naman ang ating buhay o hindi tayo maliligtas sa Araw ng Paghuhukom:

“Kahit ang kanilang pilak o ang kanilang ginto man ay hindi makapagliligtas sa kanila sa kaarawan ng kapootan ng Panginoon; kundi ang buong lupain ay masusupok sa pamamagitan ng apoy ng kaniyang paninibugho: sapagka't wawakasan niya, oo, isang kakilakilabot na wakas, nilang lahat na nagsisitahan sa lupain.” (Zef. 1:18)

Maging ang natamong talino at dunong sa mundong ito ay mawawalan din ng saysay sa Araw ng Paghuhukom dahil ang mga ito ay hindi makapagliligtas sa atin:

“Sapagkat nasusulat, ‘Sisirain ko ang karunungan ng marurunong, at pawawalang-kabuluhan ang katalinuhan ng matatalino’.” (I Cor. 1:19, Magandang Balita Biblia)

Dapat lamang na tayo ay mag-aral, maghanapbuhay, at magsikap upang umunlad ang ating buhay.  Ngunit hindi natin dapat ubusin lahat ng ating panahon at pagpapagal sa mga bagay na ito.  Tandaan natin na mayroong lalong mahalaga kaysa rito—ang paglilingkod sa Diyos at ang pagsunod sa Kaniyang mga utos na siyang dahilan kaya Niya tayo nilalang.  Kung hindi natin ito tutuparin, tiyak na tayo’y parurusahan.

ANG TUNAY NA PAKINABANG

Totoo bang wala tayong pakikinabangin kung paglilingkuran at susundin natin ang Diyos at si Jesus?  Ganito ang sagot ng ating Panginoong Jesucristo sa tanong na katulad ng kay Apostol Pedro:

“Sinabi ni Pedro, ‘Iniwan namin ang lahat at sumunod sa inyo.  Ano ngayon ang mapapakinabang namin?’  Sumagot si Jesus, ‘Sinasabi ko sa inyo ang katotohanan, kapag ang Anak ng Tao’y nasa kanyang trono na sa bagong daigdig, kayong sumunod sa akin ay luluklok din sa labindalawang trono upang hukuman ang labindalawang lipi ng Israel.  At sinumang mag-iwan ng kanyang bahay, kapatid, magulang, anak o bukid dahil sa akin ay tatanggap ng isandaang ulit at magmamana ng buhay na walang hanggan.” (Mat. 19:27-29, New Pilipino Version)

Isakripisyo man natin ang lahat sa buhay na ito alang-alang sa pagsunod ay hindi tayo malulugi.  Ang susunod ay magmamana ng buhay na walang hanggan.  Ito ba ay maliit na pakinabang?  Anong bagay na pinagkakaabalahan natin sa mundong ito ang makapagbibigay sa atin ng buhay na walang hanggan?  Wala—tanging ang paglilingkod at pagsunod sa Diyos at kay Jesus.  Kaya, marapat lamang na pag-ukulan natin ito ng malaking pagpapahalaga.

Subalit, saan natin matatamo ang buhay na walang hanggan na siya ring kinaroroonan ng tunay na sumunod sa Diyos at kay Jesus?  Ganito ang sabi ng Biblia:

“ At ito ang patotoo, na tayo'y binigyan ng Dios ng buhay na walang hanggan, at ang buhay na ito ay nasa kaniyang Anak. Ang kinaroroonan ng Anak ay kinaroroonan ng buhay; ang hindi kinaroroonan ng Anak ng Dios ay hindi kinaroroonan ng buhay. ” (I Juan 5:11-12)

Upang magkamit ng buhay na walang hanggan, kailangang naroon tayo sa kinaroroonan ng Anak.  Alin ang kinaroroonan ng Anak?  Ganito ang sabi sa Colosas 1:18:

“At siya ang ulo ng katawan, sa makatuwid baga'y ng iglesia.”

Ang kinaroroonan ng Anak o ng Panginoong Jesus ay ang katawan o ang Iglesiang pinangunguluhan Niya.  Ang Iglesiang ito ay ang Iglesia ni Cristo ayon sa Roma 16:16:

“Magbatian kayo ng banal na halik.  Lahat ng iglesya ni Cristo ay bumabati sa inyo.” (NPV)

Kaya, ang tunay na sumunod sa Diyos at sa ating Panginoong Jesucristo ay ang mga umanib sa tunay na Iglesia ni Cristo.  Pakikinabangan lamang natin ang ating ginagawang paglilingkod sa Diyos at matatamo lamang natin ang buhay na walang hanggan kung tayo ay nasa loob ng Iglesia ni Cristo.  Ito ay dahil sa ang tanging may karapatang maglingkod sa ating Panginoong Diyos ay ang mga nalinis sa kasalanan sa pamamagitan ng dugo ni Cristo:

“Gaano pa kaya ang dugo ni Cristo, na sa pamamagitan ng walang hanggang Espiritu ay inihandog sa Dios ang kanyang sarili na walang kapintasan, upang malinis ang ating budhi mula sa gawaing maghahatid sa kamatayan.  Sa gayon, makapaglilingkod tayo sa buhay na Dios!” (Heb. 9:14, Ibid.)

Kung hindi tayo malilinis sa ating mga kasalanan, kahit maglingkod tayo ay hindi rin ito tatanggapin ng Diyos.  Tandaan nating dahil sa ating mga kasalanan, tayo’y itinuring na kaaway ng Diyos, hiwalay sa Kaniya, at walang karapatan upang maglingkod (Col. 1:20; Is. 59:2).  Para mapatawad ang ating mga kasalanan ay kailangang matubos tayo ng dugo ni Cristo.  Ang pinatutunayan ng Biblia na tinubos ni Cristo ng Kaniyang dugo ay ang Kaniyang Iglesia:

“Ingatan ninyo kung gayon ang inyong mga sarili at ang buong kawan na rito’y hinirang kayo ng Espiritu Santo na mga katiwala, upang pakanin ang iglesia ni Cristo na binili niya ng kaniyang dugo.”  (Gawa 20:28, Lamsa Translation, isinalin mula sa Ingles)

Sa loob lamang ng Iglesia ni Cristo makakamtan ang kapatawaran ng ating mga kasalanan.  Kaya, kung nais nating maging katanggap-tanggap ang ating paglilingkod sa Diyos ay dapat tayong umanib sa Iglesia ni Cristo.  Sa ganitong paraan, makatitiyak tayo ng kaligtasan:

“Ngunit ipinadama ng Diyos ang kanyang pag-ibig sa atin nang mamatay si Cristo para sa atin noong tayo’y makasalanan pa.  At ngayong napawalang-sala na tayo sa pamamagitan ng kanyang dugo, lalo nang tiyak na maliligtas tayo sa poot ng Diyos sa pamamagitan niya.” (Roma 5:8-9, MB)

Walang katumbas ang biyaya at kapalaran na ating tatanggapin kung ating paglilingkuran ang Diyos at ang Panginoong Jesus sa loob ng tunay na Iglesia.  Ito ang higit nating dapat pahalagahan at lalong pag-ukulan ng panahon sa ating buhay sapagkat ito ang magdudulot sa atin ng kaligtasan at buhay na walang hanggan.*

Inaanyayahan ka naming dumalo sa aming mga pagsamba.

Polyeto

Inilathala ng Iglesia ni Cristo

Patnugutan:  Iglesia ni Cristo Central Office

No. 1 Central Avenue, New Era

Lungsod ng Quezon, Pilipinas 1107

Bible Study Suggestion: If you have further questions, please feel free to visit the Iglesia ni Cristo congregation nearest you. A minister or an evangelical worker would be happy to answer any biblical question you have in mind.

IGLESIA NI CRISTO SITE

ANG PAGTATATAG NI CRISTO NG IGLESIA NI CRISTO SA PILIPINAS

ANG PAGTATATAG NI CRISTO NG IGLESIA NI CRISTO SA PILIPINAS

Ang pinakamalaking suliranin ngayon ay kung alin ang tunay na Iglesiang kay Cristo.  Sa panahon ni Cristo noong unang siglo ay hindi ito suliranin, sapagkat noon ay walang ibang Iglesia kundi ang Iglesiang itinatag ni Cristo at kinaaaniban ng mga Apostol.  Subalit sa panahon natin ay totoong napakaraming Iglesia at ang bawat isa’y nagsasabing sila ang tunay na kay Cristo.  Dahil dito’y naguguluhan ang mga tao.  Hindi nila matiyak kung alin sa dinami-rami ng mga Iglesia ngayon ang tunay na Iglesia ng ating Panginoong Jesucristo.

Makikilala kaya natin sa panahong ito ang tunay na Iglesiang itinatag ni Cristo?  Opo, makikilala natin.  Papaano?  Si Cristo rin ang magpapakilala sa atin kung alin ang tunay Niyang Iglesia sa pamamagitan ng mga aral na Kanyang itinuro na nakasulat sa Banal na Kasulatan.

ALIN ANG TUNAY NA

IGLESIANG ITINATAG NI CRISTO?

Sa Mat. 16:18, ay ganito ang sinabi ni Cristo:

“At sinasabi ko naman sa iyo, na ikaw ay Pedro, at sa ibabaw ng batong ito ay itatayo ko ang aking iglesia; at ang mga pintuan ng Hades ay hindi magsisipanaig laban sa kaniya.”

Ang sabi ni Cristo:  “Itatayo ko ang aking Iglesia.”  Ito ang tunay na Iglesia.  Alin?  Ang itinatag ni Cristo!  Kailanma’t hindi si Cristo ang nagtatag, hindi ito tunay na Iglesia kundi huwad na Iglesia.  Ano ang tawag ni Cristo sa Iglesia na Kanyang itinayo?  Ang tawag ni Cristo’y “Aking Iglesia.”  Ano naman ang itinawag ng mga Apostol sa Iglesiang itinayo ni Cristo na tinawag ni Cristong “Aking Iglesia?”  IGLESIA NI CRISTO ayon kay Apostol Pablo (Roma 16:16).  Bakit Iglesia ni Cristo ang itinawag ni Pablo sa Iglesiang itinayo ni Cristo?  Sapagkat sinabi ni Cristo:  “Aking Iglesia”—kaya matuwid ang pagkatawag ni Pablo:  “IGLESIA NI CRISTO.”  Samakatuwid, ang tunay na Iglesiang itinatag ni Cristo ay ang Iglesia ni Cristo.

Pinatutunayan ba ng mga paring Katoliko at ng mga pastor Protestante na Iglesia ni Cristo nga ang itinatag ni Cristo?  Unahin muna  natin ang patotoo ng paring Katoliko.  Sa aklat na sinulat ng paring Katolikong si Francis B. Cassilly, na pinamagatang Religion:  Doctrine and Practice, pahina 442, 443, ay ganito ang sinasabi:

“Did Jesus Christ establish a Church?

“Yes, from all history, both secular and profane, as well as from the Bible considered as a human document, we learn that Jesus Christ established a Church, which from the earliest times has been called after him the Christian Church or the Church of Christ.”

Sa wikang Pilipino:

“Si Jesucrito ba’y nagtatag ng Iglesia?

“Oo, mula sa lahat ng kasaysayan, maging pansalibutan at di-ukol sa kabanalan, laluna sa mula sa Biblia na kinikilalang makataong kasulatan, nalaman natin na si Jesucristo’y nagtatag ng Iglesia, na mula pa sa kaunaunahang panahon ay tinawag ng sunod sa Kanya ang Iglesia Cristiana o ang Iglesia ni Cristo.”

Maliwanag ang patotoong ito ni Pari Cassilly.  Si Cristo ay nagtatag ng Iglesia at ang pangalang itinawag ay Iglesia ni Cristo.  Ano pa ang patotoo ng paring ito tungkol sa Iglesiang itinatag ni Cristo?  Sa pahina 444 ng aklat ding ito ni Pari Cassilly, ay ganito pa ang sinasabi:

“This Church, founded and organized by Christ and preached by the Apostles, is the Church of Christ …  It is the only true Church, and the one which God orders all men to join.”

Sa wikang Pilipino:

“Ang Iglesiang ito, itinayo at binalangkas ni Cristo at ipinangaral ng mga Apostol, ay ang Iglesia ni Cristo …  Ito lamang ang tunay na Iglesia, at siyang ipinag-utos ng Diyos na aniban ng lahat ng tao.”

Pinatutunayan pa rin dito ng paring si Cassilly na ang Iglesiang itinatag ni Cristo at ipinangaral ng mga Apostol ay ang Iglesia ni Cristo.  Ito lamang daw ang tunay na Iglesia at siyang ipinag-utos ng Diyos na aniban ng lahat ng tao.  Narito naman ang patotoo ng mga pastor Protestante.  Sa isang munting aklat na sinulat ni A. G. Hobbs na pinamagatang The Right Church, pahina 5, ay ganito ang nasusulat:

“The Church of Christ is the only Church that Jesus built.”

Sa wikang Pilipino:

“Ang Iglesia ni Cristo ay siya lamang tanging Iglesia na tinayo ni Jesus.”

Sa isa pang munting aklat ng isang pastor Protestante na si Don H. Morris na pinamagatang What Is The Church Of Christ?, pahina 1, ay ganito ang nasusulat:

“The Church of Christ, therefore, is the Church of the New Teatament.”

Sa wikang Pilipino:

“Ang Iglesia ni Cristo, kung gayon, ang Iglesia ng Bagong Tipan.”

Nagkakaisa ang mga katoliko at protestante sa pagsasabing ang tunay na Iglesiang itinatag ni Cristo ay ang Iglesia ni Cristo.  Bakit?  Talaga namang walang mababasa sa Biblia na maiiba pa roon.

PAPAANO ITINATAG NI

CRISTO ANG KANYANG IGLESIA?

Sa Mat. 16:18, ay ganito ang ating mababasa:

“At sinasabi ko naman sa iyo, na ikaw ay Pedro, at sa ibabaw ng batong ito ay itatayo ko ang aking iglesia; at ang mga pintuan ng Hades ay hindi magsisipanaig laban sa kaniya.”

Papaano?  Itinayo Niya sa ibabaw ng bato.  Sino ang bato na pinagtayuan?  Sa Gawa 4:10, 11, ay ganito ang sinabi ni Apostol Pedro:

“Talastasin ninyong lahat, at ng buong bayan ng Israel, na sa pangalan ni Jesucristo ng taga Nazaret, na inyong ipinako sa krus, na binuhay ng Dios na maguli sa mga patay, dahil sa kaniya ay nakatindig ang taong ito sa inyong harap na walang sakit.

“Siya ang bato na itinakuwil ninyong mga nagtayo ng bahay, na naging pangulo sa panulok.”

Sino ang bato?  Ayon kay Apostol Pedro, si Cristo ang bato.  Samakatuwid, kay Cristo nakatayo ang Iglesia ni Cristo.  Kung gayon, upang maging Iglesia ni Cristo ang tao, kailangang siya’y matayo kay Cristo.  Papaano matatayo ang tao kay Cristo?  Sa Mat. 7:24-25, ay ganito ang sinasabi:

“Kaya't ang bawa't dumirinig ng aking mga salitang ito at ginaganap, ay matutulad sa isang taong matalino, na itinayo ang kaniyang bahay sa ibabaw ng bato:  At lumagpak ang ulan, at bumaha, at humihip ang mga hangin, at hinampas ang bahay na yaon; at hindi nabagsak: sapagka't natatayo sa ibabaw ng bato.”

Paano matatayo ang tao kay Cristo?  Sa pamamagitan ng pakikinig at pagtupad sa mga salita ni Cristo.   Sinabi ni Cristo na ang bawat dumirinig ng Kanyang mga salita at ginaganap, ay matutulad sa isang taong matalino na itinayo ang kanyang bahay sa ibabaw ng bato.  Alam na nating ang bato ay si Cristo.  Alin naman itong bahay?  Iglesia ang bahay, ayon sa I Tim. 3:15.  Kung gayon, upang matayo sa bato o kay Cristo—upang maging Iglesia ni Cristo,—kailangang makinig ng mga salita ni Cristo at ganapin ito.  Kanino makikinig?  Sa lahat ba ng nagsisipangaral?  Sa Roma 10:14-15, ay ganito ang sinasabi:

“Paano nga silang magsisitawag doon sa hindi nila sinampalatayanan? at paano silang magsisisampalataya sa kaniya na hindi nila napakinggan? at paano silang mangakikinig na walang tagapangaral?

“At paano silang magsisipangaral, kung hindi sila mga sinugo. …”

Kanino dapat makinig ng mga salita ni Cristo?  Sa mga tagapangaral na sinugo.  Mga sinugo lamang ng Diyos ang may karapatang mangaral.  Kailanma’t may sugong tagapangaral at may pakikinig at pagtupad ng mga salita ni Cristo, ay may pagtatatag ng Iglesia ni Cristo.  Ngayong nasa langit na si Cristo, papaano ang paraan ng pagtatatag ng Iglesia ni Cristo?  Sa Luc. 10:16, ay sinabi ni Cristo:

“Ang nakikinig sa inyo (sa mga sinugo), ay sa akin nakikinig. …”

Ang paraan ni Jesus sa pagtatatag ng Iglesia ni Cristo kung wala na Siya sa lupa ay makinig sa mga sugo Niya.  Ang nakikinig sa mga sugo ay kay Cristo rin nakikinig.  Talaga bang may sasampalataya sa pakikinig sa mga sinugo?  Ganito ang patotoo ni Jesus:

“Kung paanong ako'y iyong sinugo sa sanglibutan, sila'y gayon ding sinusugo ko sa sanglibutan.

“Hindi lamang sila ang idinadalangin ko, kundi sila rin naman na mga nagsisisampalataya sa akin sa pamamagitan ng kanilang salita.” (Juan 17:18, 20).

Pinatutunayan ni Jesus na may magsisisampalataya sa pamamagitan ng pakikinig sa Kanyang mga sinugo.  Ang mga ito man ay kinikilala ni Cristo na Kanya—Iglesia ni Cristo.  Kahit wala na Siya sa lupa, makinig lamang sa Kanyang mga sinugo’y sa Kanya rin nakikinig.  Itong mga nakinig na ito at tumupad ay natatayo kay Cristo—nagiging Iglesia ni Cristo.  Kung gayon, upang maging tunay na Iglesia ni Cristo, kailangang si Cristo ang nagtayo, sa kanya ang itinayo at nakinig sa Kanya.  Ganito ba ang pagkakatatag ng Iglesia ni Cristo sa Pilipinas?

PAPAANO BA NAGKAROON NG

IGLESIA NI CRISTO SA PILIPINAS?

Sa Juan 10:16, ay ganito ang sabi ni Cristo:

“At mayroon akong ibang mga tupa, na hindi sa kulungang ito: sila'y kailangan din namang dalhin ko, at kanilang diringgin ang aking tinig; at sila'y magiging isang kawan, at magkakaroon ng isang pastor.”

Ang sabi ni Cristo, mayroon pa Siyang ibang mga tupa na wala pa sa kulungan noong Siya’y narito pa sa lupa.  Ang mga ito ay dadalhin Niya at kanilang diringgin ang Kanyang tinig, at sila’y gagawin Niyang isang kawan at magkakaroon ng isang pastor.  Ano itong kawan?  Sa Gawa 20:28, tinitiyak na ang kawan ay ang Iglesia ng Panginoon.  Ang Panginoon ay si Cristo (Gawa 2:36).  Samakatuwid, ang kawan ay ang Iglesia ni Cristo.  Kung gayon, gagawin ni Cristong Iglesia ni Cristo itong Kanyang ibang mga tupa na noong Siya’y narito pa sa lupa ay wala pa sa kulungan.  Sinu-sino naman itong mga tupa ni Cristo na nasa kulungan na noon at sinu-sino naman itong wala pa sa kulungan?  Sa Gawa 2:39, ay ganito ang sinasabi:

“Sapagka't sa inyo ang pangako, at sa inyong mga anak, at sa lahat ng nangasa malayo, maging ilan man ang tawagin ng Panginoon nating Dios sa kaniya.”

Ang tanong natin ay kung sinu-sino ang mga tupa ni Jesus na nasa kulungan na at ang mga wala pa sa kulungan.  Ang isinagot sa atin ng talata ay tatlong pulutong ng mga taong tatanggap ng Espiritu Santo.  Ang una’y “sa inyo;” ikalawa’y “sa inyong mga anak;” at ikatlo’y “sa lahat ng nangasa malayo, maging ilan man ang tawagin ng Diyos.”  Ang dalawang naunang pulutong ay natawag na, kaya ang mga ito’y nasa kulungan na noon;  ngunit itong huli o ang ikatlong pulutong ay hindi pa natatawag noon kundi tatawagin pa lamang sila, kaya wala pa sila sa kulungan noong si Cristo’y narito pa sa lupa.  Sinu-sino ba itong mga natawag na o nasa kulungan na noong si Cristo ay narito pa sa lupa at nang panahon ng mga Apostol?  Sa Roma 9:24, ay ganito ang patotoo ni Apostol Pablo:

“Maging sa atin na kaniya namang tinawag, hindi lamang mula sa mga Judio, kundi naman mula sa mga Gentil?”

Ang mga natawag na nang panahon ni Cristo at ng mga Apostol dito sa lupa ay ang mga Judio at ang mga Gentil.  Ito ang mga tupa ni Cristo na nasa kulungan na noon.  Sino naman itong mga tupa ni Cristo na wala pa sa kulungan noon?  Ito ang mga nasa malayo, na noon ay hindi pa sila tinatawag kundi tatawagin pa lamang, kaya wala pa sila sa kulungan.  Alin itong malayo na kinaroroonan ng mga tupa ni Cristo na wala pa sa kulungan o hindi pa natatawag noong si Cristo ay narito pa sa lupa?  Sa Isa. 43:6, ay ganito ang nasusulat:

“Aking sasabihin sa hilagaan, Bayaan mo, at sa timugan, Huwag mong pigilin; dalhin mo rito ang aking mga anak na lalake na mula sa malayo, at ang aking mga anak na babae na mula sa wakas ng lupa.”

Kinikilala rin ng Diyos na Kanyang mga anak itong mga tupa ni Cristo na nasa malayo, na noong panahon Niya rito sa lupa ay mga wala pa sa kulungan.  Ngunit aling malayo?  Sa Isa. 43:5, ay ganito ang nasusulat:

“Huwag kang matakot, sapagka't ako'y sumasaiyo: aking dadalhin ang iyong lahi mula sa silanganan, at pipisanin kita mula sa kalunuran.”

Aling malayo?  Malayong Silangan!  Ang sabi ng iba, wala raw kaming mababasang Malayong Silangan sa Biblia.  May mababasa raw na salitang malayo na ito’y nasa talatang 6, at may mababasa raw na salitang silangan na ito nama’y nasa talatang 5, ngunit iyong salitang malayong silangan na magkasama o magkakabit ay wala raw mababasa.  Kung may mabasa kaming Malayong Silangan na sa Ingles ay Far East, aaminin kaya ng mga tumutuligsa sa amin na sila’y nagkamali at naninirang-puri lamang?  Ipababasa namin sa inyo sa Biblia ang salitang Malayong Silangan at nang kayo’y maniwala.  Sa Isa. 43:5, ng Bibliang Ingles na salin ni James Moffatt, ay ganito ang nasusulat:

“From the far east will I bring your offspring ….”

Sa wikang Pilipino:

“Mula sa malayong silangan ay Aking dadalhin ang iyong lahi ….”

Hindi ba maliwanag na Malayong Silangan ang nabasa ninyo?  Maliwanag!  Marahil ay maitatanong ninyo:  Bakit sa Bibliang Tagalog ay wala iyong malayong silangan?  Kung wala man ay hindi kami ang dapat sisihin kundi ang mga nagsalin sa Tagalog ng Biblia—ang mga Protestante at maging ang mga Katoliko.

Alin naman ang Malayong Silangan?  Sa World History nina Boak, Slosson at Anderson, pahina 445, ay ganito ang sinasabi:

“The Philippines were Spain’s share of the first colonizing movement in the Far East.”

Sa wikang Pilipino:

“Ang Pilipinas ay naging bahagi ng Espanya sa unang kilusan sa pananakop sa Malayong Silangan.”

Maliwanag na pinatutunayan ng kasaysayan na ang Malayong Silangan ay ang Pilipinas.  Lahing Pilipino, kung gayon, itong mga tupa ni Cristo na wala pa sa kulungan noong Siya ay narito pa sa lupa.  Ngunit ano ang sabi Niya?  Ang mga ito’y dadalhin Niya at diringgin ang Kanyang tinig at sila’y gagawin Niyang isang kawan o Iglesia.  Ang dapat pansinin dito’y si Cristo ang gagawang kawan o Iglesia sa mga tupang ito na wala pa sa kulungan noon.  Siya ang magtatayo nito, ito’y mga tupa Niya at makikinig sa Kanyang tinig—kaya ito’y matatayo sa Kanya o magiging Iglesia ni Cristo.

Iglesia ni Cristo nga kaya itong mga kinikilala ng Diyos na Kanyang mga anak na lalake at babae na lilitaw rito sa Pilipinas?  Ano ba ang pangalang itatawag dito sa mga tupa ni Cristo at kinikilala ng Diyos na Kanyang mga anak na lalake at babae?

PAPAANO PINATUNAYAN NG HULA NG DIYOS

NA IGLESIA NI CRISTO ANG LILITAW SA PILIPINAS?

Sa Isa. 43:5-7, ay ganito ang nasusulat:

“Huwag kang matakot, sapagka't ako'y sumasaiyo: aking dadalhin ang iyong lahi mula sa silanganan, at pipisanin kita mula sa kalunuran;

“Aking sasabihin sa hilagaan, Bayaan mo, at sa timugan, Huwag mong pigilin; dalhin mo rito ang aking mga anak na lalake na mula sa malayo, at ang aking mga anak na babae na mula sa wakas ng lupa;

“Bawa't tinatawag sa aking pangalan, at yaong aking nilikha ay sa aking kaluwalhatian, yaong aking inanyuan oo, yaong aking ginawa.”

Ano ang pangalang itatawag ayon sa hula rito sa mga anak na lalake at babae na mula sa malayong silangan o Pilipinas?  Ang sabi ng Diyos, sila’y tatawagin sa Kanyang pangalan.  Aling pangalan ng Diyos?  Iyon bang pangalang pansarili ng Diyos?  Hindi!  Aling pangalan?  Yaong pangalan na Kanyang nilikha o ginawa para sa Kanyang kaluwalhatian.  Alin ba ang pangalang ginawa ng Diyos sa Kanyang ikaluluwalhati?  Sa Gawa 2:36, ay ganito ang sinasabi:

“Pakatalastasin nga ng buong angkan ni Israel, na ginawa ng Dios na Panginoon at Cristo itong si Jesus na inyong ipinako sa krus.”

Alin ang pangalang ginawa ng Diyos?  Ang pangalang Cristo.  Ito nga ba’y sa ikaluluwalhati ng Diyos?  Opo, gaya ng pinatutunayan sa Filip. 2:9-11.  Papaano ba kung itawag ang pangalang Cristo sa mga kinikilala Niyang mga tupa Niya?  Iglesia ni Cristo kung ito’y itawag, ayon sa Roma 16:16.  Ano ang kahalagahan ng pangalang ito?  Wala bang kabuluhan ang pangalang ito?  Dapat ba itong palitan o baguhin?  Sa Gawa 4:10, 12, ay ganito ang nasusulat:

“Talastasin ninyong lahat, at ng buong bayan ng Israel, na sa pangalan ni Jesucristo ng taga Nazaret, na inyong ipinako sa krus, na binuhay ng Dios na maguli sa mga patay, dahil sa kaniya ay nakatindig ang taong ito sa inyong harap na walang sakit.

“At sa kanino mang iba ay walang kaligtasan: sapagka't walang ibang pangalan sa silong ng langit, na ibinigay sa mga tao, na sukat nating ikaligtas.”

Napakahalaga ng pangalan ni Cristo o ng pangalang Iglesia ni Cristo!  Sa kaninumang iba’y walang kaligtasan, sapagkat walang ibang pangalan sa silong ng langit na ibinigay sa mga tao na sukat ikaligtas, maliban sa pangalan ni Cristo.  Kaya hindi kami sang-ayon sa pangalang Katoliko, Metodista, Presbiteriana, Baptista, Aglipayano.  Walang kaligtasan sa mga pangalang iyan.  Hindi kami ang maysabi kundi ang Banal na Kasulatan!  Sa pangalang Iglesia ni Cristo lamang may kaligtasan.  Kaya ano ang ipinag-utos ni Cristo sa lahat ng ibig maligtas sa hatol ng Diyos?  Sa Juan 10:9, ay sinabi ni Jesus:

“Ako ang pintuan; ang sinomang taong pumasok sa akin, ay siya’y maliligtas ….”

Ano ang dapat gawin upang maligtas?  Dapat pumasok kay Cristo.  Papasok na ano?  Papasok na sangkap ng Kanyang katawan (I Cor. 12:27), na ito ang Iglesia (Col. 1:18)—Iglesia ni Cristo (Roma 16:16).  Samakatuwid, upang maligtas sa hatol ng Diyos, kailangang maging Iglesia ni Cristo.  Ang Iglesia ni Cristo na lumitaw sa Pilipinas noong 1914 ay siyang tunay na Iglesiang kay Cristo sa kasalukuyan.  Si Cristo ang nagtayo nito at kinikilala ni Cristo na Kanyang mga tupa, na noong Siya’y narito pa sa lupa ay wala pa sa kulungan, ngunit sinabi ni Cristong gagawin Niyang isang kawan o Iglesia—Iglesia ni Cristo.

Hango mula sa aklat na ISANG PAGBUBUNYAG SA IGLESIA NI CRISTO/1964/PAHINA 139-147

Bible Study Suggestion: If you have further questions, please feel free to visit the Iglesia ni Cristo congregation nearest you. A minister or an evangelical worker would be happy to answer any biblical question you have in mind.

IGLESIA NI CRISTO SITE

SI CRISTO ANG NAGTAYO NG IGLESIA NI CRISTO SA PILIPINAS

SI CRISTO ANG NAGTAYO NG IGLESIA NI CRISTO SA PILIPINAS

HINDI kapani-paniwala ang paksang ito para sa mga kumakaaway sa Iglesia ni Cristo na lumitaw saPilipinas noong 1914.  Sa ganang kanila ay si Kapatid na Felix Manalo ang nagtayo ng Iglesia ni Cristo sa Pilipinas.  Dahil sa maling paniniwalang ito, patudyo nilang tinatawag ang Iglesia ni Cristo ng Iglesia ni Manalo.  Patawarin nawa sila ng Diyos sapagkat hindi nila nalalaman ang kanilang sinasabi!

Ayon sa mga nakaraang kabanata ang Iglesiang itinayo ni Cristo noong unang siglo sa Jerusalem ay natalikod.  Iniligaw ng mga bulaang propeta o ng mga paring katoliko.  Ang mga unang alagad ni Cristo’y pinasunod nila sa kanilang hulihan o tinuruan nila ng mga aral ng demonio, at ang mga hindi sumunod o sumalansang ay kanilang pinagpapatay.  Kaya walang natirang tupa si Cristo noong unang siglo.  Nalipol na lahat.  Datapuwa’t wala na kayang ibang mga tupa si Jesus?  Bakit sinasabi naming si Cristo ang nagtayo ng Iglesia ni Cristo sa Pilipinas?

ANG KATUNAYAN NA SI CRISTO ANG

NAGTAYO NG IGLESIA NI CRISTO SA PILIPINAS

Ano ang katunayang si Cristo ang nagtayo ng Iglesia ni Cristo sa Pilipinas?

Sa Juan 10:16, ay ganito ang sinasabi ng ating Panginoong Jesucristo:

“At mayroon akong ibang mga tupa, na hindi sa kulungang ito: sila'y kailangan din namang dalhin ko, at kanilang diringgin ang aking tinig; at sila'y magiging isang kawan, at magkakaroon ng isang pastor.”

Tiniyak ni Cristo na Siya’y mayroon pang ibang mga tupa na wala sa kulungan noong panahong Siya’y narito pa sa lupa.  Ano ba itong mga tupa na sinasabi ni Jesus?  Ito ba ay mga tupang hayop?  Sa Ezek. 34:31, ay sinasabi ang ganito:

“At kayong mga tupa ko, na mga tupa sa aking pastulan ay mga tao, at ako'y inyong Dios, sabi ng Panginoong Dios.”

Samakatuwid, mga tao ang mga tupa ng Diyos at ng ating Panginoong Jesucristo.  Ayon kay Cristo, mayroon pa Siyang ibang mga tupa o mga tao na wala pa sa kulungan noong panahong Siya’y narito pa sa lupa.  Ano ang gagawin Niya sa mga tupang ito?  Gagawin Niyang isang kawan, ayon din sa talatang sinipi natin sa itaas nito (Juan 10:16).  Ano ang kahulugan ng kawan?  Sa Gawa 20:28, ay ganito ang sinasabi:

“Ingatan ninyo ang inyong sarili, at ang buong kawan, na sa kanila'y ginawa kayo ng Espiritu Santo na mga obispo, upang pakanin ninyo ang iglesia ng Panginoon na binili niya ng kaniyang sariling dugo.”

Sinasabi ritong ang kawan ay ang Iglesia ng Panginoon.  Sino ang Panginoon na tinutukoy?  Si Cristo na ginawa ng Diyos na Panginoon (Gawa 2:36).  Kung gayon, Iglesia ni Cristo ang kawan.  Sinabi ni Jesus na gagawin Niyang isang kawan o Iglesia yaong mga tupa Niya o mga tao na wala pa sa kulungan noong panahong narito pa Siya sa lupa.  Tandaan nating mabuti:  Hindi si Kapatid na Felix Manalo kundi si Cristo ang gagawang kawan o Iglesia ni Cristo sa mga kinikilala Niyang mga Tupa Niya na noon ay wala pa sa kulungan.  Ang dapat nating malaman ngayo’y bakit itong mga kinikilala ni Jesus na mga tupa Niya ay wala pa sa kulungan noong panahong Siya’y narito pa sa lupa.  Saan naroon ang mga tupang ito ni Jesus?  Sa Gawa 2:39, ay ganito ang nasusulat:

“Sapagka't sa inyo ang pangako, at sa inyong mga anak, at sa lahat ng nangasa malayo, maging ilan man ang tawagin ng Panginoon nating Dios sa kaniya.”

Sa talatang ito’y ipinakikilala sa atin ang tatlong pulutong ng mga tao na pinangakuang tatanggap ng pangakong Espiritu Santo.  Ang sabi ni Apostol Pedro na siyang nagsasalita sa pagkakataong ito ay, “sa inyo ang pangako, at sa inyong mga anak, at sa lahat ng nangasa malayo, maging ilan man ang tawagin ng Panginoon nating Dios sa kaniya.”  Sinu-sino itong kausap ni Apostol Pedro na pinagsabihan niyang “sa inyo ang pangako,” at sinu-sino naman ang “mga anak” nito; at sinu-sino itong mga “nasa malayo” na tatawagin ng Diyos?  Sa ikauunawa natin niyan ay basahin natin ang mga nasa unahang talata, mula sa talatang 36 hanggang 39:

“Pakatalastasin nga ng buong angkan ni Israel, na ginawa ng Dios na Panginoon at Cristo itong si Jesus na inyong ipinako sa krus.

“Nang marinig nga nila ito, ay nangasaktan ang kanilang puso, at sinabi kay Pedro at sa ibang mga apostol, Mga kapatid, anong gagawin namin?

“At sinabi sa kanila ni Pedro, Mangagsisi kayo, at mangagbautismo ang bawa't isa sa inyo sa pangalan ni Jesucristo sa ikapagpapatawad ng inyong mga kasalanan; at tatanggapin ninyo ang kaloob ng Espiritu Santo.

“Sapagka't sa inyo ang pangako, at sa inyong mga anak, at sa lahat ng nangasa malayo, maging ilan man ang tawagin ng Panginoon nating Dios sa kaniya.”

Sinu-sino itong tinutukoy ni Apostol Pedro ng salitang “sa inyo?”  Ito ang angkan ni Israel o ang mga Judio na nagsisi at nagpabautismo sa pangalan ni Cristo.  Ito ang mga tupa ni Jesus na nasa kulungan na noong panahong yaon.  Sinu-sino naman itong “mga anak?”  Ito ba’y mga anak sa laman ng mga Judio?  Sa I Cor. 4:15, ay ganito ang sinasabi:

“Sapagka't bagaman mangagkaroon kayo ng sampung libong mga guro kay Cristo, ay wala nga kayong maraming mga ama; sapagka't kay Cristo Jesus ipinanganak ko kayo sa pamamagitan ng evangelio.”

Si Apostol Pablo ang nagsasalita sa talatang ito at ang kausap niya’y ang mga Gentil.  Si Pablo’y lahing Judio.  Sinabi niya sa mga Gentil na sila’y “ipinanganak niya sa pamamagitan ng ebanghelyo.”  Kung gayon, ang mga anak na kasama rin sa tatanggap ng pangakong Espiritu Santo ay ang mga Gentil.  Nasa kulungan na rin ang mga ito noong panahong yaon.  Sinu-sino naman itong “mga nasa malayo” na kasama rin sa pangako?  Ito ang mga tupa ni Jesus na wala pa sa kulungan noong panahong si Cristo’y narito pa sa lupa at ang mga Apostol, at kaya sila’y wala pa sa kulungan noon ay sapagkat sila’y hindi pa tinatawag noon kundi tatawagin pa lamang.  Saan sila naroon?  Nasa malayo!  Alin itong malayong tinutukoy?  Sa Isa. 43:5-6, ay ganito ang pahayag ng hula:

“Huwag kang matakot, sapagka't ako'y sumasaiyo: aking dadalhin ang iyong lahi mula sa silanganan, at pipisanin kita mula sa kalunuran;

“Aking sasabihin sa hilagaan, Bayaan mo, at sa timugan, Huwag mong pigilin; dalhin mo rito ang aking mga anak na lalake na mula sa malayo, at ang aking mga anak na babae na mula sa wakas ng lupa.”

Aling malayo ang kinaroroonan ng mga tupa ni Jesus na hindi pa tinatawag noong panahong narito pa Siya sa lupa kaya sila’y wala pa noon sa kulungan?  Ito ang malayong silangan.  Ayon sa mga kumakaaway sa Iglesia ni Cristo, wala raw mababasang “Malayong Silangan” sa Biblia.  Mayroon daw mababasang “silangan” na ito ay nasa talatang 5, at “malayo” na nasa talatang 6; subalit iyong magkasamang salitang “Malayong Silangan” ay hindi raw mababasa sa Biblia.  Hindi nga kaya mababasa sa Biblia ang salitang Malayong Silangan?  Kung mabasa namin, tatanggapin kaya ng mga umuusig sa Iglesia ni Cristo na sila’y nagkamali at sila’y walang malay sa Biblia?  Patutunayan naming mababasa sa Biblia ang salitang Far East o Malayong Silangan.  Sa Bibliang Ingles na salin ni James Moffatt ay ganito ang maliwanag na nakasulat:

“From the far east will I bring your offspring …”

Sa Wikang Pilipino:

“Mula sa malayong silangan ay aking dadalhin ang iyong lahi …”

Hindi ba maliwanag na nabasa ninyo ang salitang Malayong Silangan?  Maliwanag!

Bakit sa Bibliang Tagalog ay wala ito?  Hindi na kami ang may kasalanan nito kundi ang mga nagsalin sa Tagalog ng Biblia mula sa Ingles—mga Katoliko at Protestante.

Alin ang bansang nasa Malayong Silangan?  Sa World History nina Boak, Slosson at Anderson, pahina 445, ay ganito ang nasusulat:

“The Philippines were Spain’s share of the first colonizing movement in the Far East;”

Sa Wikang Pilipino:

“Ang Pilipinas ay naging bahagi ng Espanya sa unang kilusan sa pananakop sa Malayong Silangan;”

Kung gayon, taga Pilipinas (mga Pilipino) ang mga tupa ni Jesus na wala pa sa kulungan noong panahong narito pa si Cristo sa lupa.  Ano ang sinabi ni Jesus na Kanyang gagawin sa mga tupa Niyang ito?  Gagawin Niyang isang kawan o itatayo Niyang isang Iglesia.  Si Cristo ang magtatayo at hindi si Kapatid na Manalo.  Ito ang dapat malaman ng mga kumakaaway sa Iglesia ni Cristo.  Ngunit kaya hindi ito matanggap ng mga umuusig sa Iglesia ni Cristo ay sa dahilang si Kapatid na Manalo ang nakitang nangaral ng Iglesia ni Cristo sa Pilipinas.  Hindi nila nakita si Cristo at hindi naman naparito sa Pilipinas si Cristo upang ipangaral ang Iglesia ni Cristo.  Ni ang mga Apostol ay hindi rin nakarating sa Pilipinas.  Papaano nga naman mangyayari ang sinasabi naming si Cristo ang nagtayo ng Iglesia ni Cristo sa Pilipinas? Kung gayon, ang dapat nating liwanagin ay kung papaano nagkakaroon ng mga taong nagiging kaanib sa Iglesia ni Cristo.  Ito ang malabo sa mga tao kaya ito ang ating pag-aaralan.

PAPAANO NAGKAKAROON NG MGA TAONG

NAGIGING KAANIB SA IGLESIA NI CRISTO?

Sa I Cor. 1:9, ay ganito ang sinasabi:

“Ang Dios ay tapat, na sa pamamagitan niya ay tinawag kayo sa pakikisama ng kaniyang anak na si Jesucristo na Panginoon natin.”

Maliwanag dito na ang Diyos ang tumatawag ng mga taong ipakikisama Niya sa Kanyang Anak na si Jesucristo.  Bakit naman kailangan pang tawagin ng Diyos ang mga taong ipakikisama Niya sa Kanyang Anak na si Cristo o ang mga taong nagiging Iglesia ni Cristo?  Sa Juan 6:44, ay ganito ang sabi ni Jesus:

“Walang taong makalalapit sa akin, maliban nang ang Amang nagsugo sa akin ang sa kaniya'y magdala sa akin; at siya'y aking ibabangon sa huling araw.”

Bakit kailangan pang tawagin ng Diyos ang mga nagiging Iglesia ni Cristo?  Sapagkat ayon kay Cristo, walang taong makalalapit sa Kanya maliban nang dalhin sa Kanya ng Ama.  Papaano naman dinadala ng Ama ang mga tao kay Cristo?  Tinatawag upang ipakisama sa Kanyang Anak na si Jesucristo, gaya ng naliwanagan na natin sa unahan nito.  Papaano naman ang paraan ng pagtawag ng Diyos sa mga taong ipinakikisama Niya kay Cristo?  Sa II Tes. 2:14, ay ganito ang sinasabi sa atin:

“Sa kalagayang ito'y tinawag niya kayo sa pamamagitan ng aming evangelio, upang magkamit ng kaluwalhatian ng ating Panginoong Jesucristo.”

Samakatuwid, ang paraan ng Diyos sa pagtawag sa mga taong nagiging Iglesia ni Cristo ay sa pamamagitan ng pangangaral ng Ebanghelyo.  Ngunit sino ang mangangaral ng Ebanghelyo?  Ang Diyos ba mismo ang haharap sa tao upang mangaral ng Ebanghelyo?  Sa II Cor. 6:1, ay ganito ang sinasabi:

“At yamang kalakip niyang gumagawa ay ipinamamanhik din namin sa inyo na huwag ninyong tanggapin ang biyaya ng Dios na walang kabuluhan.”

Ang Diyos ay may kalakip na gumagawa.  Ang mga ito ang kinakasangkapan ng Diyos sa pangangaral ng Ebanghelyo upang matawag ang mga taong magiging Iglesia ni Cristo.  Sinu-sino itong mga kalakip ng Diyos na gumagawa?  Sa II Cor. 5:18-20, ay ganito ang sinasabi:

“Datapuwa't ang lahat ng mga bagay ay pawang sa Dios, na pinakipagkasundo tayo sa kaniya rin sa pamamagitan ni Cristo, at ibinigay sa amin ang ministerio sa pagkakasundo;

“Sa makatuwid baga'y, na ang Dios kay Cristo ay pinakipagkasundo ang sanglibutan sa kaniya rin, na hindi ibinibilang sa kanila ang kanilang mga kasalanan, at ipinagkatiwala sa amin ang salita ng pagkakasundo.

“Kami nga'y mga sugo sa pangalan ni Cristo, na waring namamanhik ang Dios sa pamamagitan namin: kayo'y pinamamanhikan namin sa pangalan ni Cristo, na kayo'y makipagkasundo sa Dios.”

Sinu-sino ang mga kalakip ng Diyos na gumagawa na siyang inutusang mangaral ng Ebanghelyo upang matawag ang mga taong magiging Iglesia ni Cristo?  Ang mga sugo sa pangalan ni Cristo—hindi mga sugo sa pangalang Katoliko o sa pangalang Protestante, kundi mga sugo sa pangalan ni Cristo o Iglesia ni Cristo.  Bakit ang mga sugo sa pangalan ni Cristo ang ginagamit ng Diyos sa pagtawag sa mga taong magiging Iglesia ni Cristo?  Sapagkat sa kanila ibinigay ang ministerio o pangangasiwa sa pagkakasundo, at sa kanila rin ipinagkatiwala ang salita ng pagkakasundo na ito ang Ebanghelyo.  Kaya kapag nangangaral ng Ebanghelyo ang mga sugo sa pangalan ni Cristo, ang Diyos ay tumatawag ng mga taong ipakikisama Niya sa Kanyang Anak na si Jesucristo.

SINO ANG MAGDADALA KAY CRISTO NITONG MGA

TUPA NI JESUS NA NASA PILIPINAS?

Sa Isa. 43:5-6, ay ganito ang sinasabi:

“Huwag kang matakot, sapagka't ako'y sumasaiyo: aking dadalhin ang iyong lahi mula sa silanganan, at pipisanin kita mula sa kalunuran;

“Aking sasabihin sa hilagaan, Bayaan mo, at sa timugan, Huwag mong pigilin; dalhin mo rito ang aking mga anak na lalake na mula sa malayo, at ang aking mga anak na babae na mula sa wakas ng lupa.”

Sinabi ng Diyos na Siya ang magdadala sa lahi ng Kanyang sugo na mula sa malayong silangan o Pilipinas.  Kanino dadalhin ng Diyos?  Dadalhin kay Cristo.  Bakit naman kailangan pang dalhin kay Cristo?  Sapagkat sinabi ni Cristo na walang taong makalalapit sa Kanya maliban nang dalhin sa Kanya ng Ama (Juan 6:44).  Alam na natin kung papaano dinadala ng Diyos ang mga tao kay Cristo.  Tinatawag ng Diyos sa pamamagitan ng pangangaral ng ng Ebanghelyo ng mga gumagawang kalakip ng Diyos, na ito ang sugo sa pangalan ni Cristo.

Papaano dinala ng Diyos kay Cristo ang mga tupa ni Jesus na nasa Pilipinas?  Mayroon din bang kinasangkapan ang Diyos na kalakip Niyang gumagawa upang matawag at madala kay Cristo ang mga tupa nito na nasa Pilipinas?  Mayroon!  Gaya ng sinasabi sa talatang ating kasisipi pa lamang:  “Huwag kang matakot, sapagka’t ako’y sumasaiyo:  aking dadalhin ang iyong lahi mula sa silanganan.”  “Ako’y sumasaiyo,” ang sabi ng Diyos sa Kanyang sugo.  Samakatuwid, kalakip ng Diyos sa paggawa itong Kanyang sugo.  Hindi nag-iisa ang sugong ito.  Ang Diyos ay sumasakanya.  Kasama niya ang Diyos.  Ang sugong ito ang kalakip ng Diyos na gumagawa at siyang nangangaral ng Ebanghelyo upang madala ng Diyos kay Cristo ang mga tupa ni Jesus na nasa Pilipinas.  Samakatuwid, wala pa kay Cristo itong mga kinikilala na ni Jesus na Kanyang mga tupa at kinikilala rin ng Diyos na Kanyang mga anak na lalake at babae.  Saan at kanino sila naroroon?  Sila’y nakukulong at pinipigil ng Timugan at Hilagaan.  Ang kumakatawan sa Timugan ay ang Iglesia Katolika, sapagkat ito ay mula sa Roma na nasa Timugan ng Europa.  Ang kumakatawan naman sa Hilagaan ay ang Protestantismo, sapagkat ito’y mula sa Hilagaang Amerika.  Kung gayon, ang mga kinikilala ng Diyos na Kanyang mga anak at kinikilala ni Jesus na Kanyang mga tupa ay nasa Katoliko at Protestante.  Sila’y kukunin ng Diyos doon at dadalhin kay Cristo o gagawin Niyang Iglesia ni Cristo, sa pamamagitan ng pagtawag sa mga ito sa pagkasangkapan Niya sa Kanyang sugong magmumula sa Pilipinas.

Sa ano itinulad ang uri ng gawain nitong sugong mula sa Malayong Silangan o Pilipinas?  Sa Isa. 46:11, ay ganito ang sinasabi:

“Na tumatawag ng ibong mangdadagit mula sa silanganan, ng taong gumagawa ng aking payo mula sa malayong lupain; oo, aking sinalita, akin namang papangyayarihin; aking, pinanukala, akin namang gagawin.”

Itinulad sa ibong mandaragit ang uri ng gawain ng sugo ng Diyos na gagamitin Niya sa pagdadala kay Cristo ng mga tupa ni Jesus sa Pilipinas.  Ang ibong mandaragit na tinutukoy rito’y hindi tunay na ibon sa kalagayan, kundi ito’y tao na gumagawa ng mga payo ng Diyos.  Saan mula ang ibon?  Sa Silanganan.  Saan naman mula ang tao na ito rin ang ibon?  Sa malayo.  Samakatuwid, ang taong sinugo ng Diyos na itinulad sa ibong mandaragit ay mula sa Malayong Silangan o Pilipinas.  Sino ang sugong ito?  Ito ang sugo ng Diyos sa huling araw, na ito’y walang iba kundi si Kapatid na Felix Manalo.  Siya ang kinasangkapan ng Diyos upang mangaral ng Ebanghelyo at nang madala kay Cristo ang mga tupa ni Jesus na nasa Pilipinas.  Kaya’t ang tunay na nagtayo ng Iglesia ni Cristo rito sa Pilipinas ay hindi si Kapatid na Felix Manalo, kundi ang Diyos at si Cristo.

ANO ANG PANGALANG ITATAWAG SA MGA TUPA NI

JESUS NA LILITAW SA PILIPINAS NA ISANG IGLESIA?

Sa Isa. 43:7, ay ganito ang pahayag ng hula:

“Bawa't tinatawag sa aking pangalan, at yaong aking nilikha ay sa aking kaluwalhatian, yaong aking inanyuan oo, yaong aking ginawa.”

Ayon sa pahayag ng hula, ang mga tupa ni Jesus na lilitaw sa Pilipinas na isang Iglesia ay tatawagin sa pangalang nilikha o ginawa ng Diyos.  Alin ang pangalang nilikha o ginawa ng Diyos?  Ang pangalang Cristo, ito ang pangalang ginawa ng Diyos (Gawa 2:36).  Papaano kung itawag ang pangalang Cristo sa mga tupa ni Cristo?  Iglesia ni Cristo kung itawag (Roma 16:16).  Kung gayon, ang pangalang Iglesia ni Cristo na itinawag sa mga tupa ni Jesus na lilitaw sa Pilipinas, ay hindi kinatha ni Kapatid na Manalo.  Ang Diyos ang gumawa ng pangalang ito, kaya ito’y mahalagang pangalan.  Ano ang kahalagahan ng pangalang Cristo o Iglesia ni Cristo?  Sa Gawa 4:10, 12, ay ganito ang sinasabi:

“Talastasin ninyong lahat, at ng buong bayan ng Israel, na sa pangalan ni Jesucristo ng taga Nazaret, na inyong ipinako sa krus, na binuhay ng Dios na maguli sa mga patay, dahil sa kaniya ay nakatindig ang taong ito sa inyong harap na walang sakit.

“At sa kanino mang iba ay walang kaligtasan: sapagka't walang ibang pangalan sa silong ng langit, na ibinigay sa mga tao, na sukat nating ikaligtas.”

Dito’y tinitiyak sa atin ang kahalagahan ng pangalang Cristo na siyang itinawag sa iglesiang lilitaw sa Pilipinas ayon sa itinakda ng hula.  Nasa pangalang ito ang kaligtasan.  Sa ibang pangalan ay walang kaligtasan.  Sa pangalang Katoliko, Protestante, Aglipay, at iba pa, ay walang kaligtasan.  Ang ibinigay ng Diyos na pangalang ikaliligtas ng mga tao sa silong ng langit ay ang pangalang Cristo.  Kaya’t sa pangalang ito dapat tawagin ang taong nagnanais magtamo ng kaligtasan.  Bakit maliligtas ang taong sasampalataya sa pangalan ni Cristo, at bakit hindi maliligtas ang hindi sasampalataya sa pangalang ito?  Sa Juan 3:18, ay ganito ang sinasabi:

“Ang sumasampalataya sa kaniya ay hindi hinahatulan; ang hindi sumasampalataya ay hinatulan na, sapagka't hindi siya sumampalataya sa pangalan ng bugtong na Anak ng Dios.”

Bakit maliligtas ang sumasampalataya sa pangalan ni Cristo?  Sapagkat ang sumasampalataya sa pangalan ni Cristo ay hindi hinahatulan.  Bakit naman hindi maliligtas ang hindi sumasampalataya?  Sapagkat hinatulan na ang hindi sumasampalataya sa pangalan ni Cristo.  Bakit naman hindi na hinahatulan ang sumasampalataya sa pangalan ni Cristo?  Sapagkat ang kanilang mga kasalanan ay ipinatawad na dahil sa pangalan ni Cristo (I Juan 2:12).  Ang hindi sumampalataya sa pangalan ni Cristo ay hindi magtatamo ng kapatawaran, kaya sila’y hinatulan na.

KAILAN ITINAKDA NG HULA ANG PAGLITAW SA

PILIPINAS NG IGLESIA NI CRISTO NA MGA TUPA NI JESUS?

     Ayon sa hulang sinipi na natin sa unahan nito (Isa. 43:5-6), ang panahong itinakda ng Diyos sa paglitaw ng Iglesia ni Cristo sa Pilipinas ay sa mga wakas ng lupa.  Kailan itong mga wakas ng lupa?  Upang matiyak natin ito, kailangan nating pag-aralan ang pagkakahati ng panahon ni Cristo.  Sa ilang hati nababahagi ang panahon ni Cristo?  Sa Apoc. 5:1, ay ganito ang sinasabi:

“At nakita ko sa kanang kamay niyaong nakaupo sa luklukan ang isang aklat na may sulat sa loob at sa labas, na tinatakang mahigpit ng pitong tatak.”

Mapapansin natin sa pagbasa ng talatang ito na tila malayo ang sagot sa ating tanong.  Ang itinatanong natin ay kung ilang bahagi nahahati ang pahanon ni Cristo, ang isinagot sa ati’y isang aklat na may pitong tatak.  Tunay na aklat kaya itong natatatakan ng pitong tatak?  Sa Isa. 29:11, ay ganito naman ang nakasulat:

“At ang lahat ng pangitain ay naging sa inyo'y gaya ng mga salita ng aklat na natatatakan, na ibinibigay ng mga tao sa isang marunong bumasa, na sinasabi, Iyong basahin ito, isinasamo ko sa iyo: at kaniyang sinasabi, Hindi ko mababasa, sapagka't natatatakan.”

Samakatuwid, hindi tunay na aklat sa kalagayan itong aklat na natatatakan ng pitong tatak kundi ito’y pangitain.  Ang panahon ba ni Cristo’y ipinakita nga sa pangitain?  Sa Apoc. 1:10, 17-19, ay ganito ang sinasabi:

“Ako'y nasa Espiritu nang araw ng Panginoon, at narinig ko sa aking likuran ang dakilang tinig, na tulad sa isang pakakak.

“At nang siya'y aking makita, ay nasubasob akong waring patay sa kaniyang paanan. At ipinatong niya sa akin ang kaniyang kanang kamay, na sinasabi, Huwag kang matakot; ako'y ang una at ang huli,

“At ang Nabubuhay; at ako'y namatay, at narito, ako'y nabubuhay magpakailan man, at nasa akin ang mga susi ng kamatayan at ng Hades.

“Isulat mo nga ang mga bagay na nakita mo, at ang mga bagay ngayon, at ang mga bagay na mangyayari sa darating.”

Ipinakita ba sa pangitain ang panahon ni Cristo?  Ipinakita kay Apostol Juan upang maisulat niya ang mga pangyayaring magaganap sa boong panahon ni Cristo.  Sa ilang bahagi nahahati ang buong panahon ni Cristo?  Nahahati sa pitong tatak o pitong buko ng panahon.  Alin sa pitong bukong ito ng panahon o pitong tatak ang tinatawag na mga wakas ng lupa?  Sa dulo ng ikaanim na tatak at sa simula ng ikapitong tatak.  Ito ang tinatawag na mga wakas ng lupa.  Bakit ang sabi’y mga wakas?  Sapagkat ang dulo ng ikaanim na tatak ay isang wakas at ang simula ng ikapito’y wakas din, sapagkat ito ang wakas na hati ng panahon ni Cristo, at sa dulo ng ikapitong tatak ay wakas naman ng sanlibutan, kaya kung tawagin ang dulo ng ikaanim at simula ng ikapitong tatak ay mga wakas ng lupa.  Anong petsa ito sa ating kalendaryo?  Upang ito’y matiyak natin, alamin muna natin ang pangyayaring naganap sa dulo ng ikaanim na tatak.  Ano ba ang pangyayaring naganap sa dulo ng ikaanim na tatak?  Sa Apoc. 6:12, ay ganito ang sinasabi:

“At nakita ko nang buksan niya ang ikaanim na tatak …”

Sinasabi ritong binuksan ang ikaanim na tatak.  Ano ang pangyayaring naganap sa dulo nito?  Sa talatang 15, ay ganito ang sinasabi:

“At ang mga hari sa lupa, at ang mga prinsipe, at ang mga pangulong kapitan, at ang mayayaman, at ang mga makapangyarihan, at ang bawa't alipin at ang bawa't laya, ay nagsipagtago sa mga yungib at sa mga bato sa mga bundok.”

Ano ang pangyayaring naganap sa dulo ng ikaanim na tatak?  Nagsipagtago sa yungib ang lahat ng uri ng mga tao mula sa hari hanggang sa mga alipin.  Ano ang dahilan ng pagtatago sa yungib ng mga tao?  Sa Jer. 4:13, 19, ay ganito ang sinasabi:

“Narito, siya'y sasagupang parang mga ulap, at ang kaniyang mga karo ay magiging parang ipoipo ang kaniyang mga kabayo ay lalong matulin kay sa mga aguila. Sa aba natin! sapagka't tayo'y nangapahamak.

“Ang hirap ko, ang hirap ko! Ako'y nagdaramdam sa aking puso; ang dibdib ko ay kakabakaba, hindi ako matahimik; sapagka't iyong narinig, Oh kaluluwa ko, ang tunog ng pakakak, ang hudyat ng pakikipagdigma.”

Bakit nagtago sa mga yungib ang mga hari, prinsipe, mga pangulong kapitan, mga mayayaman, mga makapangyarihan, mga alipin at mga laya sa dulo ng ikaanim na tatak?  Sapagkat may naganap na digmaan nang panahong yaon. E, ano kung may digmaan, bakit nagsipagtago ang mga tao?  Ang digmaang ito’y ginamitan ng mga makabagong kasangkapang pandigma, gaya ng mga karo na parang ipu-ipo (mga tangke) at mga kabayong matulin pa sa mga agila (mga tangke) at mga kabayong matulin pa sa mga agila (mga eroplano)—tinatawag itong ‘aerial cavalry’ o kabayuhang panghimpapawid (World History, pahina 478).  Kapag sumasalakay ang mga eroplano’y may hudyat na tumutunog—ito ang tunog ng mga sirena—na nagbabala sa mga tao na may pagsalakay mula sa himpapawid.  Kapag narinig ito ng mga tao’y kumakaba ang kanilang mga dibdib, at sila’y nagsisipagtago sa mga yungib na sa makabagong tawag ay ‘air raid shelter.’  Anong uring digmaan itong magaganap sa dulo ng ikaanim na tatak ayon sa hula ng Diyos?  Ito’y digmaan ng lahat ng mga bansa sa boong sanlibutan (Isa. 34:1-2),  samakatuwid ay Digmaang Pandaigdig.  Kailan ito naganap ayon sa ating kalendaryo?  Noong 1914.  Ang panahong ito ang tinatawag ng Biblia na mga wakas ng lupa.  Sa panahong ito itinakda ng hula ang paglitaw sa Pilipinas ng Iglesia ni Cristo na mga tupa ni Jesus.  Natupad ba ang hula?  Natupad!  Ang Iglesia ni Cristo ay napatala sa Pamahalaan noong Hulyo 27, 1914.  Sino ang tunay na nagtayo ng Iglesia ni Cristo na lumitaw sa Pilipinas noong 1914?  Hindi si Kapatid na Manalo kundi ang Diyos at si Cristo. *

Hango mula sa aklat na ISANG PAGBUBUNYAG SA IGLESIA NI CRISTO/1964/KABANATANG XVI/PAHINA 128-138