ANG TUNAY NA SA DIYOS AT KAY JESUS
MARAMING NAG-AANGKIN at naniniwala na sila ay tunay na
mga anak ng Diyos at mga lingkod ng Panginoong Jesucristo. Ito ay isang mahalagang katangian na dapat
nating matiyak sa ating sarili.
Paano natin matitiyak na tayo nga ay mga anak ng Diyos at mga
lingkod ni Jesus? Ayon sa Biblia,
makikilala ang mga tunay na lingkod ng Diyos.
Paano sila makikilala? Ganito ang sabi ng Banal na Aklat:
“Kaming iyong
lingkod, Lingkod mo kaming parang mga tupa sa iyong pastulan, Magpupuring
lagi’t magpapasalamat! (Awit 79:13, Magandang Balita Biblia)
Ayon kay
Haring David, ang mga lingkod ng Diyos ay PARANG
MGA TUPA SA PASTULAN NG DIYOS. Ang
Diyos mismo ang nagsabi na ang mga tupa na nasa Kaniyang pastulan ay Kaniyang
mga tao—mga tao ng Diyos:
“At kayong mga tupa ko, na mga tupa sa aking pastulan ay mga tao, at ako'y inyong Dios, sabi ng Panginoong Dios.” (Ezek.
34:31)
Ang mga
lingkod ng Diyos ay TINATAWAG NA TUPA AT
KABILANG SA KANIYANG PASTULAN. Ang
Panginoon ang kanilang Diyos. Sila’y
kumikilala sa Diyos at kinikilala rin sila ng Diyos:
“Ngunit ngayong
nakikilala na ninyo ang Diyos—dapat ko pa ngang sabihin, ngayong nakikilala na
kayo ng Diyos …” (Gal. 4:9, MB)
Mahalagang
kilalanin ng tao ang Diyos. Subalit
lalong mahalaga na kinikilala siya ng Diyos.
Ang mga taong kinikilala ng Diyos na mga tunay na lingkod Niya ay
kinikilala rin ni Jesus at tinatawag din Niyang KANIYANG MGA TUPA:
“Dinirinig ng aking mga tupa ang aking tinig, at sila'y aking nakikilala, at sila'y nagsisisunod sa akin.” (Juan
10:27)
Ang mga tupa
ni Jesus ay nakikinig at sumusunod sa Kaniyang tinig. Hindi sila kumikilala lamang sa Kaniya. Ang sabi ni Jesus: “… sila’y aking nakikilala.” Kaya, ang mga kay Cristo ay kinikilala Niyang Kaniyang tupa. Sila ang may kahalalan o mga lingkod ng
Diyos.
PUMASOK SA
KAWAN O IGLESIA
Ano ang isa sa mga utos ni Cristo na sinunod ng mga tunay na
lingkod ng Diyos kaya sila kinikilala ni Cristo na Kaniyang mga tupa? Ipinag-utos ng Tagapagligtas ang ganito:
“Kaya muling
nagsalita si Jesus: ‘Katotohanang sinasabi ko sa inyo, Ako ang pintuan ng
kulungan ng mga tupa’.
“Ako ang
pintuan; sinumang pumasok sa kawan sa pamamagitan ko ay magiging ligtas.”
(Jn. 10:7, 9, Revised English Bible,
isinalin mula sa Ingles)
Nauunawaan
nila na si Jesus ang pintuan ng kulungan ng mga tupa at ang mga PUMASOK SA KAWAN sa pamamagitan Niya ay
TIYAK NA MALILIGTAS. Sinunod nila ang utos na PUMASOK SA KAWAN. Dapat
Nating mapansing ang pagiging tupa ni Jesus ay kaugnay ng pangakong
kaligtasan. Ang Tagapagligtas mismo ang
gumagarantiya ng kaligtasan sa mga pumasok sa kawan.
Kaya, ang isa
sa mga pagkakakilanlan sa mga tunay na lingkod ng Diyos ay ang pagkakasangkap
nila o PAGIGING KABILANG NILA SA KAWAN. Ang kawan ay ang IGLESIA NI CRISTO:
“Ingatan
ninyo kung gayon ang inyong mga sarili at ang buong kawan na rito’y hinirang
kayo ng Espiritu Santo na mga katiwala, upang pakanin ang iglesia ni Cristo na
binili niya ng kaniyang dugo.” (Acts 20:28, Lamsa
Translation, isinalin mula sa Ingles)
Ang mga KAANIB SA IGLESIA NI CRISTO, kung
gayon, ang mga lingkod ng Diyos—MGA TUPA
NI JESUS. Angkinin man ng isang tao
na siya’y lingkod ng Diyos samantalang hindi naman siya kaanib sa Iglesia ni Cristo ay hindi siya tunay na lingkod ng Diyos. Gayundin ang kalagayan ng mga nagsasabing
hindi na kailangan pa ang Iglesia ni
Cristo at sapat nang kumilala at sumampalataya lamang kay Cristo upang
maligtas.
MATUWID NA PAMUMUHAY
Si Apostol
Pablo ay isa sa mga tunay na lingkod ng Diyos.
Ito’y pinatunayan niya sa pamamagitan ng malinis na pamumuhay:
“Ipinakilala kong ako’y lingkod ng Diyos sa pamamagitan
ng malinis na pamumuhay, kaalaman, pagpapahinuhod, kabutihang-loob, ganoon din
sa pamamagitan ng Espiritu Santo, tapat na pag-ibig, tapat na pananalita at
kapangyarihan ng Diyos.” (II
Cor.6:6-7, MB)
ANG MGA TUNAY NA LINGKOD NG DIYOS AY HINDI
LAMANG BASTA UMANIB SA IGLESIA NI CRISTO. Malinis
ang kanilang pamumuhay, masunurin, may mabuting kalooban, at may tapat na
pag-ibig. Kaya, kung paanong hindi tunay
na lingkod ng Diyos ang hindi kaanib sa Iglesia
ni Cristo ay GAYUNDIN ANG SINUMANG
KAANIB NA HINDI MALINIS ANG PAMUMUHAY—YAONG NABUBUHAY SA KASALANAN. Sa kabilang dako, hindi dapat akalain ninuman
na dahil sa malinis ang kaniyang buhay—kahit hindi siya kaanib sa Iglesia ni Cristo—ay lingkod na siya ng
Diyos. HINDI MAAARING PAGHIWALAYIN ANG PAG-ANIB SA IGLESIA AT ANG PAGTATAGUYOD
NG MALINIS NA PAMUMUHAY. Tandaan
nating nang sabihin ni Apostol Pablo na siya’y lingkod ng Diyos sa pamamagitan
ng kaniyang malinis na pamumuhay ay nasa loob na siya ng Iglesia kung saan
siya’y inilagay ng Diyos (I Cor. 12:28).
Dito kabilang ang mga tupa ni Jesus.
Bukod sa kalinisan ng pamumumuhay, ano pa ang pagkakakilanlan
sa mga tunay na lingkod ng Diyos?
Ayon kay Apostol Juan:
“Sinungaling ang sinumang nagsasabi na iniibig niya ang
Dios ngunit namumuhi naman sa kanyang kapatid.
Pagkat paano niya maiibig ang Dios na hindi nakikita kung hindi niya
maibig ang kapatid niyang nakikita? At
ito ang utos na ibinigay niya sa atin:
Sinumang umiibig sa Dios ay dapat umibig sa kanyang kapatid.” (I
Juan 4:20-21, New Pilipino Version)
ANG TUNAY NA LINGKOD NG DIYOS AY UMIIBIG SA KANIYANG KAPATID SA IGLESIA. Ang pag-ibig sa kapatid ay napatutunayan
hindi lamang sa salita kundi sa gawa.
Ang umiibig ay hindi gumagawa ng masama o ng makapipinsala sa kaniyang
kapatid sa pananampalataya sapagkat ang isa sa mga kahayagan ng pag-ibig sa
Diyos ay ang pag-ibig sa kapatid. Isang
kasinungalingan ang pagpapahayag ng pag-ibig sa Diyos ng isang taong napopoot o
namumuhi naman sa kapatid. Ipinadarama
ng tunay na lingkod ng Diyos ang kaniyang pag-ibig sa pamamagitan ng pagdamay
at pagtulong sa mga kapatid na nangangailangan.
NAKAHANDANG MAGTIIS
Sa pagtitiis
ng kahirapan, kapighatian, at mga kagipitan ay makikilala rin ang tunay na mga
lingkod ng Diyos:
“Sa halip,
ipinakikilala ko sa lahat ng paraan na ako’y lingkod ng Diyos: sa pagtitiis ng kahirapan, kapighatian, at
mga kagipitan.” (II Cor. 6:4, MB)
ANG TUNAY NA LINGKOD NG DIYOS AY
NAKAHANDANG MAGTIIS, MAHIRAPAN, MAGIPIT, AT MAPIGHATI KUNG KINAKAILANGAN. Naniniwala siyang kung danasin man niya ang
mga ito ay bahagya at panandalian lamang:
“Ang bahagya at
panandaliang kapighatiang dinaranas ko ngayon ay magbubunga ng kaligayahang
walang hanggan at walang katulad.” (II Cor. 4:17, Ibid.)
Ang pagtitiis
sa buhay na ito alang-alang sa pagiging kaanib ng Iglesia ni Cristo ay magbubunga ng kaligayahang walang hanggan at
walang katulad. Kaya, ang mga tunay na
lingkod ng Diyos ay hindi umuurong ni tumitigil man sa paglilingkod anumang
balakid o hadlang ang kanilang masagupa.
Para sa kanila, iyon ay magbubunga naman ng kaligayahang walang
hanggan. Ito ang pangakong kanilang
tinatanaw.
Sa panahon ng
kahirapan, kapighatian ay lalong nagiging malapit sa Diyos ang mga tunay Niyang
lingkod sa pag-asang diringgin sila at ililigtas (II Cron. 20:9). Nagtitiwala sila na may kakayahan ang Diyos
na tuparin ang Kaniyang ipinangako.
Hindi Niya sila pababayaan sa panahon ng kagipitan.
Inaasahan
naman ng Diyos na ang Kaniyang mga lingkod ay mananatiling tapat sa Kaniya at
kailanman ay hindi Siya pagtataksilan (Isa. 63:8, MB). Ang Diyos ay tapat sa
mga lingkod Niyang tapat (Awit 18:25, 21-24, NPV). Sino ang tapat sa
Diyos? ANG TAPAT SA DIYOS AY YAONG LUMALAKAD O SUMUSUNOD SA KANIYANG KAUTUSAN,
HINDI TUMATALIKOD SA KANIYA, MALINIS ANG PAMUMUHAY, AT LUMALAYO SA KASALANAN. Sa mga ganito nakalaan ang mga gantimpala ng
Panginoon. Ang gantimpalang ito’y ang
pag-iingat ng Diyos, ang pagsagot sa kanilang pagtawag, ang pagsaklolo sa
panahon ng pangangailangan, ang mahabang buhay, at ang kaligtasan:
“Ang sabi ng Diyos, ‘Aking ililigtas ang tapat sa
akin. At iingatan ko ang sinumang taong
ako’y kikilanlin. Pag sila’y tumawag, laging
handa ako na sila’y pakinggan, Aking sasamahan at kung may hilahil ay
sasaklolohan; Aking ililigtas at ang bawat isa ay pararangalan. Sila’y bibigyan ko’t gagantimpalaan ng
mahabang buhay, At nakatitiyak na ang tatamuhin nila’y kaligtasan’”
(Awit 91:14-16, MB)
Mahalaga ang
pananatiling tapat sa Panginoong Diyos.
Sa mga gayon ay ipinangako Niya ang Kaniyang pag-iingat, pagsama,
gantimpala, at higit sa lahat ang kaligtasan.
Tunay na
malaking biyaya ang nakalaan para sa mga taong tunay na sa Diyos at kay
Jesus. Dahil dito, napakahalang matiyak
ng tao na siya ay mapabilang sa mga kinikilalang lingkod ng Diyos—sa
pamamagitan ng pag-anib sa Iglesia ni
Cristo, pamumuhay ng matuwid, pagtitiis alang-alang sa pagsunod, at
pagtatapat sa Diyos. *
Sinulat ni:
Kapatid na DANIEL D. CATANGAY
Kinopya mula sa:
PASUGO GOD’S MESSAGE
July 2003
Pages 23-25
Emphasis:
Admin.
