Mayroon bang purgatoryo?
Ang pananampalataya ba
Ng Iglesia Katolika
Ukol sa purgatoryo
Ay naaayon sa
Mga aral ng Diyos
Na nakasulat
sa Biblia?
Ni
JOSE R. BERNISCA
Itinataguyod ng Iglesia Katolika ang aral na may purgatoryo
kung saan dinadala ang mga kaluluwa ng
mga taong namatay na hindi pa maaaring pumasok sa langit dahil sa maliliit na
kasalanan, ngunit hindi naman gaanong masama upang ibulid sa impiyerno. Ang purgatoryo raw ay sangagan ng kaluluwa:
“T. Diyata ano ang
purgatorio?
“S. Pagsasangagan
(cung baga sa guinto) sa mga caloloua ng cristianong banal na nacapagsisi man
at nacapagcumpisal man datapoua’t hindi pa nakapag-auas dito sa lupa ng buong
auas sa manga casalanan.” (Catesismo
na Pinagpalamnan, p. 24)
Ayon sa pananampalatayang
Katoliko, ang lunas daw sa paghihirap ng mga patay na nasa pagdurusa sa
purgatoryo ay ang mga indulhensiya, mga parasal, at pamisa na patungkol sa mga
patay:
“T. Baquit cailangan ang
pagcalagay sa gracia nang taong ibig magcamit nang Indulgencia?
“S. Sapagcat ang taong na sa
casalanang mortal, hanggang hindi nagcacamit nang patauad sa tunay na
pagsisising Contricion, o sa mabuting pangungumpisal, ay dapat magdusa magparating
man saan sa apoy nang Infierno, at hindi sa Purgatorio lamang.
“T. Bucod sa mga Indulgencias,
?anuano ang ibang bagay na nacapapaui nang parusang nararapat sa taong
nagcasala nang daquila, cung macamtan na niya ang capatauaran nang parusang
ualang hanggan?
“S. Ang mabuting pag-ganap nang
parusang ipinagbilin nang Confesor, at gayon din naman ang mga gauang
cabanalan, at ang pagtitiis nang anumang hirap, cung ang calulua ay na sa
gracia: At cung hindi mapaui sa buhay na ito ang
nasabing parusa, na pinanganganlang pena temporal, ay sapilitang babayaran sa
Purgatorio.
“T. Baquit pinaquiquinabangan
nang mga calulua sa Purgatorio ang mga gauang magaling, na ipinatutungcol natin
sa canila?
“S. Sapagcat sila ay mga catoto
nang Dios: at inibig nang Dios na ang
mga taong binyagan ay napaquinabangan nang canicaniyang gauang cabanalan, cung
na sa gracia ang pinatutungculan: at
caya dinadasal natin sa Sumasampalataya
ang mga uicang may casamahan ang mga Santos
“Ang
dinadalita ng mga kaawaawang kaluluwa sa purgatorio ay ang hindi pagkakita sa
Dios at maraming sarisaring hirap at sakit.
Wala silang magagawa sa sarili nila upang makaalis sa kanilang
kapahamakan. Nguni’t tayong nabubuhay pa
dito sa lupa ang makatutulong at makapagbabayad ng kanilang utang sa Dios. Tayo ay makatutulong sa kanila sa paraan ng
mga panalangin, ng mga indulgensiang ipinatutungkol sa kanila, ng mga
paglilimos at ng ibang gawang kabanalan, lalong lalo na sa paraan ng sacrificio
ng Santa Misa.” (Siya
ang Inyong Pakinggan: Ang Aral na
Katoliko, p. 73)
Ngunit ang pananampalataya bang ito
ng Iglesia Katolika ay naaayon sa mga aral ng Diyos na nakasulat sa Biblia?
Nasa
alabok
Ayon sa biblia, saan naroon ang mga namatay? Narito ang ilang pahayag:
“At bakit hindi mo ipinatatawad ang aking
pagsalangsang, at inaalis ang aking kasamaan? Sapagka't ngayo'y mahihiga ako sa alabok; at ako'y hahanapin mong
mainam, nguni't wala na ako.” (Job 7:21)
“Sa pawis ng iyong mukha ay kakain ka ng tinapay, hanggang
sa ikaw ay mauwi sa lupa; sapagka't diyan ka kinuha: sapagka't ikaw ay alabok
at sa alabok ka uuwi.” (Gen. 3:19)
Mula nang
magkasala ang tao, ipinasiya ng Diyos na siya’y uuwi sa alabok at mananatili
roon hanggang sa araw na mawala ang kalangitan:
“Nguni’t mamamatay ang tao; siya’y ililibing, mapapatid ang
kanyang hininga at wala nang kasunod.
Kung paanong ang tubig ay nawawala sa dagat o ang isang ilog ay
natutuyo, gayon ang tao, nahihiga at di
na nagbabangon; hanggang sa mawala ang kalangitan, ang tao’y di na gigising
o magagambala pa sa kanyang pagtulog.”
(Job 14:10-12, New Pilipino
Version)
Ang pagkawala ng
langit—na siyang panahon ng pagbangon ng mga patay—ay magaganap sa Araw ng
Paghuhukom o sa Muling Pagparito ng Panginoong Jesucristo:
“Datapuwa't darating ang araw
ng Panginoon na gaya ng magnanakaw; na ang sangkalangitan sa araw na iyan ay
mapaparam na kasabay ng malaking ugong, at ang mga bagay sa langit ay
mapupugnaw sa matinding init, at ang lupa at ang mga gawang nasa lupa ay pawang
masusunog.
“Na ating hinihintay at pinakananasa ang
pagdating ng kaarawan ng Dios, na
dahil dito'y ang sangkalangitan na nagniningas ay mapupugnaw, at ang mga bagay
sa langit ay matutunaw sa matinding init? ” (II Ped. 3:10, 12)
Itinuturo ng Banal na Kasulatan na marami sa
mga taong hahatulan sa Araw ng Paghuhukom ay talagang magmumula sa alabok ng
lupa:
“At marami sa kanila na nangatutulog sa alabok ng lupa
ay mangagigising,
ang iba'y sa walang hanggang buhay, at ang iba'y sa kahihiyan at sa walang
hanggang pagkapahamak.” (Dan. 12:2)
Malinaw ang
pagtuturo ng Biblia na ang taong namatay ay mauuwi sa alabok at mananatili roon
hanggang sa maganap ang Araw ng Paghuhukom.
Ang patay ay wala pa sa langit, ni sa impiyerno, at lalong wala sa
tinatawag nilang purgatoryo sapagkat wala nito sa pagtuturo ng Biblia.
Subalit sinasabi
ng mga Katoliko na hindi naman daw ang mismong katawang laman ang dinadala agad
sa langit, sa impiyerno, o sa purgatoryo kundi ang kaluluwa. Ganito ang sagot ng Biblia laban sa gayong
paniniwala:
“Narito, lahat ng kaluluwa ay
akin; kung paano ang kaluluwa ng ama, gayon din ang kaluluwa ng anak ay akin: ang kaluluwa na nagkakasala ay mamamatay.” (Ezek. 18:4)
“Sapagka't
ang aming kaluluwa ay nakasubsob sa alabok: ang aming katawan ay nadidikit sa lupa.”
(Awit 44:25)
Wala
nang malay o pag-iisip
Ang patay ay wala
nang pag-iisip:
“Ang hininga niya ay
pumapanaw, siya'y nanunumbalik sa kaniyang pagkalupa; sa araw ding yaon ay mawawala ang kaniyang pagiisip.” (Awit 146:4)
Nawawala ang
kaniyang alaala at kaalaman ukol sa lahat ng bagay. Siya ay walang anumang bahagi sa gawain ng
buhay:
“Alam ng buhay na siya’y mamamatay ngunit ang patay ay walang anumang nalalaman. Wala na silang pag-asa, at nakakalimutan nang
lubusan. Nawawala pati ang kanilang
pag-ibig, pagkapoot, pagkainggit; anupa’t wala silang namamalayan sa anumang
nangyayari sa daigdig.” (Ecles.
9:5-6, Magandang Balita Biblia)
Wala nang nalalaman ang patay tungkol sa anumang bagay na ginagawa o
nangyayari sa kaniyang naiwan. Sa Job.
14:21 ay ganito ang mababasa:
“Ang kaniyang
mga anak ay nagtataglay ng karangalan, at hindi
niya nalalaman; at sila'y ibinababa, nguni't hindi niya nahahalata sila.”
Ang patay ay wala nang magagawang
anuman, lalo na ang pagdalangin o pagpuri sa Diyos:
“Di na
siya mapupuri niyong mga taong patay, Niyong mga nahihimlay sa malamig na
libingan.” (Awit 115:7, MB)
Kaya, maling tawagan o dalanginan ang mga diumano’y banal o mga santo na
nagsipanaw na sa paniniwalang maipapamagitan nila ang tao sa Diyos. Hindi magagawa ng taong patay ang
magpasalamat ni tumawag sa Dakilang Lumikha:
“Bumalik ka, Oh
Panginoon, palayain mo ang aking kaluluwa: iligtas mo ako alangalang sa iyong
kagandahang-loob. Sapagka't sa kamatayan
ay walang alaala sa iyo; sa Sheol ay sinong mangagpapasalamat sa iyo?” (Awit 6:4-5)
Hindi ukol sa purgatoryo
Ang nilalaman ng Mateo 12:32 at 5:26 ay pinagbabatayan ng Iglesia
Katolika ng aral nito tungkol sa purgatoryo.
Ganito ang sinasabi sa naturang talata:
“At ang sinomang
magsalita ng isang salitang laban sa Anak ng tao, ay ipatatawad sa kaniya;
datapuwa't ang sinomang magsalita laban sa Espiritu Santo ,
ay hindi ipatatawad sa kaniya, kahit sa sanglibutang ito, o maging sa darating.
“Katotohanang sinasabi ko sa iyo, Hindi ka
aalis doon sa anomang paraan, hanggang hindi mo mapagbayaran ang
katapustapusang beles.”
Pagtatapat ng paring Katoliko
Isang dating paring Katoliko ang nagtapat ng katotohanan tungkol sa
purgatoryo—si Lucien Vinet. Ganito ang
sinabi niya sa kaniyang isinulat na aklat na pinamagatang I Was A Priest:
“Purgatory
had been invented by Rome
“Purgatory,
like Mass, has no foundation in Holy Scripture, Christ and the first
Christians never talked about it and never knew of its supposed existence. …
“We ex-priest, know very well that Mass
and Purgatory are inventions that are exceedingly profitable.”
[Ang
Purgatoryo ay inimbento ng Roma noong A.D. 593 ngunit ito ay nanatili na
isang lubhang di-kilalang doktrina sa loob ng maraming siglo. …
Ang
Purgatoryo, tulad ng Misa, ay walang saligan sa Banal na Kasulatan. Hindi kailanman nag-usap si Cristo at ang mga
unang Cristiano tungkol dito at kailanman ay wala silang kabatiran sa
ipinalalagay na pagkakaroon nito.
Alam na alam naming mga dating pari na ang
Misa at Purgatoryo ay mga imbensiyong lubhang mapagkakakitaan.]
(pp.43-44)
Inamin ni Lucien Vinet na ang Misa at Purgatoyo ay inimbento lamang ng
Iglesia Katolika upang mapagkakitaan ng salapi.
Ang aral ng Iglesia Katolika tungkol sa purgatoryo ay wala sa
Biblia. Hindi ito itinuro ng Panginoong
Jesucristo at ng mga apostol. Kaya
marapat lamang na maging mapanuri at bukas ang isipan ng mga naniniwala sa
kathang ito—hindi sila dapat magpadaya sa mga maling aral na hindi ikaliligtas.@@@@@
Pasugo God’s Message, November 2000, p. 16-19.
__________________________________________________________[Study IglesiaNi Cristo]
_________________________________________________________
Inaanyayahan ka naming dumalo
sa mga pagsamba ng
Iglesia ni Cristo.
Bible Study Suggestion: If you have further questions, please feel free to visit the Iglesia ni Cristo congregation nearest you. A minister or an evangelical worker would be happy to answer any biblical question you have in mind.
________________________________________________________________________
